Premier League : Tu nge nipui transfer bazar hmang ṭha ber?

Premier League club-in nipui transfer-ah pound tluklehdingawn khat (£1bn) chuang an hmang a, tun ṭum hi transfer ngaihnawm ber ṭum a ni hial ang. Chutihrualin transfer tawp niah erawh a fel tur angte a fel deuh ṭhup tawh avangin a tawp boruak erawh a sang tawk lo.

Striker nei lo City
Manchester City-in Sergio Aguero an chhuahtir a, Premier League champion hian Argentine striker thlakna tur an la lo. Pep Guardiola hote hian England captain Harry Kane an beisei a, Spurs chairman Daniel Levy an ngam lo.

City hi Cristiano Ronaldo nen pawh sawizawm ni mah se Portugal captain hi a club hlui Manchester United-ah a kal ta zawk. Chutihrualin Man City hian pound maktaduai 100-in Jack Grealish an la ta tho.

Striker nei lo a, ṭha taka khel thei tur erawh Pep Guardiola naute an ni a, Spanish manager hian out and out striker tel loin a team a rem fo. Tun season-ah pawh champion nawn tura rinkai an ni tho a, amaherawhchu striker nei lo chuan an la champion lohna Champions League nomawi hi chu a har khawp ang.

Chelsea an hlim
Man City elpui ber tura ngaih Chelsea hi nipui bazar hmang ṭha ber an ni hial ang. London club hian manto takin Romelu Lukaku an lalut a ni ringawt lo a, an player ṭhahnem tak man man takin an chhuahtir. Transfer tawp niah Atletico Madrid aṭangin loan hmangin Saul Niguez an lalut a, an player lak tum Sevilla defender Joules Kounde la thei lo mah se Thomas Tuchel leh a hote lawm avanga kut beng thei tur an ni.

Lukaku hi pound maktaduai 97.5 man a ni a, Blues-in an chhuahtir Tammy Abraham (£34m), Kurt Zouma (£25m) leh Fikayo Tomori (£24m) man belhkhawm hi pound maktduai 83 a ni pha. Player dang langsar vak lo an hralhna nena belhkhawm phei chuan pound maktaduai 40 chuang an la hlep pha zawk!

Blues-in coach ṭha bik Thomas Tuchel an nei a, German manager hian goalkeeper aṭanga striker thlengin world class player rual chhawr tur a neih avangin inelna hrang hrangah champion rinkai zinga chhiar tel theih an ni ang.

United thawm a ring
Manchester United-in an manager Ole Gunnar Solskjaer an thlawp ṭha tih chu nipui transfer-ah an lantir a, Norwegian manager tan chhuanlam siam a thiang tawh lo - nomawi chawi a hun ta.

United-in Jadon Sancho (£73m) leh Raphael Varane (£42m a pung chho thei tur) an lalut a, an hlim vang lai takin Cristiano Ronaldo an lalut a, hei ngei hi 'hnung lama sa barh ang' an tih chu a ni.

Amaherawhchu, United ṭantuten duhthu an sam a, defensive midfielder an beisei. Transfer tawp zanah Ruben Neves an beisei a, Wolves midfielder hi an la thei ta lo. Man United midfield hi Southampton leh Wolves lakah an che buai a, team angin an ṭha tawk ang em tih chu zawhna a awm thei thung ang.

Reds an reh
Premier League champion rinkaiten player an lakluh laiin Liverpool-in player contract an pawtsei thung. Reds hian pound maktaduai 35-in RB Leipzig defender Ibrahima Konate an lalut a, player dang an lak belh lo.

Kylian Mbappe hming sawi rik a ni a, hei erawh mumang ram ang chauh a ni a, transfer hun dangah pawh a thlen theih a beiseiawm loh. Jurgen Klopp hi ngaihdan nghet tak nei a nih avangin transfer tawp nia an elpui club-in an sum an hmang tam vanga mamawh lo lei chi a ni lo bawk.

Transfer-ah Reds reh mah se lawmna tur erawh a awm. Defender ṭha mi Virgil van Dijk a dam tawh a, player pawimawh dang Trent Alexander-Arnold, Fabinho, Alisson, Andy Robertson leh Jordan Henderson te nen contract an pawtsei vek. Liverpool hi an elpui Chelsea leh Man City te angin a chhah tawk lo a ni thei a, amaherawhchu hliamin a tlakbuak lo a nih chuan champion rinkai an ni pha.

North London club
Arsenal-in pound maktaduai 145 bawr vel player lei nan an hmang a, Premier League club zinga sum hmanga nasa ber ni mah se league lama an result ṭha lo avangin an chanchinin sawi a hlawh tawk lo.

Mikael Arteta hote hian season bul an ṭan ṭhat loh avangin champion rinkai zingah dah an ni lo a, Gunners hmelma Tottenham erawh Harry Kane an chelh vang ringawt pawhin sawi nep theih an ni lo. Chu chauh ni loin Spurs hi league hmahruaitu an ni mek.

Nuno Espírito Santo hote hian nipui bazarah Spanish player hmabak nei êng Bryan Gil chu pound maktaduai 21.6-in an lalut a, a manah Erik Lamela an pek tel avangin a tlawm lo. Atalanta aṭangin Argentine defender Cristian Romero chu pound maktaduai 42.5 zetin an lalut a, Hugo Lloris-a elpui turin loan hmangin keeper Pierluigi Gollini chu loan hmangin an la bawk.

Transfer tawp niah Barcelona aṭangin right back Emerson Royal an lalut a, player pawimawh Son Heung-min contract an pawhsei bakah academy player Oliver Skipp a rintlak chhoh bawk avangin Champions League khelh phak chauh ni loin nomawi hial an beisei thei ang.

Team dang hi
Everton-in manager tawnhriat nei ṭha Rafael Benítez an lakluh avangin en liam an harsa, Toffees hian Andros Townsend, Asmir Begovic, Demarai Gray leh Salomon Rondon te an lalut. Chutihrualin player mana an pawisa sen zat hi Gray-a an lakna pound maktaduai 1.7 chauh hi ni a, Benitez-a hote hi club lian point chhuhsak thei tur an nih bakah season tharah Europe-a khelh an beisei thei ang.

Leicester City hi team ṭha zingah an tel tawh a, transfer lai pawhin Patson Daka, Boubakary Soumare, Ryan Bertrand leh Jannik Vestergaard bakah loan hmangin Ademola Lookman an lalut leh bawk. Brendan Rodgers-a hote hi sawi vul chuk tur ni si loin club lian el thei ber zinga mi an nih leh a rinawm.

David Moyes-a kaihhruai West Ham hi season liam ta khan parukna an ni a, Jesse Lingard la thei lo mah se transfer laia reh tawp erawh an ni lo. Hammers hian tlarhnung ti chak turin Kurt Zouma an lalut a, CSKA Moscow aṭangin attacker Nikola Vlasic bakah loan hmangin Spartak Moscow midfielder Alex Kral an la bawk. Moyes-a hoten Europe-a inlan nawn an tum dawn a ni.