Euro maktaduai 220 hnar thei PSG
Real Madrid-in Kylian Mbappe lak tumin euro maktaduai 220 thehchhuah inhuam mah se Paris St-Germain-in an hnar. French club tana Lionel Messi, Neymar leh Mbappe te inkawp chu khawvelin a hmu dawn ta.
Mbappe hian thla 10 chiah contract a nei tawh a, a contract neih lai pawhsei tumna a neih loh bawk avangin PSG tan hralh mai loh chu tih theih dang a awmin a lang lo. Amaherawhchu Qatari sum mawn chawm pha French club-in an hnar ngam.
Los Blancos sum thehchhuah phalzat hi thuthang chauh a ni a, hetiang zat zat hi ni kher lo pawh ni se a tam thawkhat tih erawh a chiang. Chutihrualin PSG lamin Mbappe hi chelh an tum a, kum hnih chhung contract pawtsei tura an thlemna hi Lionel Messi hlawh aiin an tam zawk ni hialin an sawi.
French club-in Real Madrid dilna ṭum thum an hnar nia sawi a ni a, Mbappe hi a thlawna chhuahtir an tum dawn loh bawk avangin contract ṭha zawk an zawrh ngei a rinawm bawk. Chutihrualin January thla hian Mbappe hi Real Madrid nen contract an ziak lawk tiha sawi a ni a, hei erawh a thlen phawt loh chuan rin ngam chi a ni lo.
PSG club neitute hi an sum dinhmun a ṭhat avangin European Super League-a tel ve tura sawmna pawh an hnar thei a, Lionel Messi an lakluh hnua Mbappe an chelh thei hian sum lama an buai loh zia a nemnghet.
Real Madrid-in Mbappe an lak theih tak loah chuan La Liga-in 'star player' tiha sawi tur an kawl lo a ni ber a, October 24-a khelh tur 'El Clascio' pawh a hlutna a tlahniam sawt ang. Chutihrualin hemi ni veka khel tur PSG leh Marseille inkhel turah erawh Mbappe, Messi leh Neymar te inlan thei an ni a, ngaihven a hlawh lo thei lo.
Premier League lamah pawh October 24 hian Liverpool leh Manchester United te an inkhel dawn a, Cristiano Ronaldo vangin khawvelin Premier League an thlir ṭhup ang. La Liga erawh Europe league sang zingah tel pha mah se Ronaldo an chân hnua Messi an chân leh tak avangin a hlutna a tlahniam dawn.
La Liga president Javier Tebas pawh PSG chet danah a thinur hle. Tebas chuan, "Club dinhmun hi a ṭha lo hle. Super League kan ngaihven nachhan pawh European football a tihchhiat theih vang a ni a, PSG pawh hi chik an ṭul reng a ni. Covid-19 vangin euro maktduai 300 chuang an hloh a, TV aṭanga France-in a lakluh pawh 40% in a tlahniam a, engtin nge hlawh ringawtah euro maktaduai 500 an la pek theih? sawifiah theih a ni lo," tiin na takin a sawisel.
PSG hian Mbappe an chelh bakah hian loan-in player langsar rual Lionel Messi, Sergio Ramos, Gianluigi Donnarumma leh Georginio Wijnaldum te an lalut. Euro maktaduai 60-in Serie A champion aṭangin Achraf Hakimi an lalut a, an player neihsa dah ṭhat pawhin an lak tharte hlawh ringawt hi a tam dawn.
Transfer tawp niah loan hmang thoin Nuno Mendes chu Sporting Lisbon aṭangin an lalut. Portugal international left back loan-a an hawhna ringawt pawh hi euro maktaduai sarih a ni a, euro maktduai 40-a lak ngheh theih dan a awm bawk a ni.