Premier League club-te an inbuatsaih ṭan

Mizote ngaihven Premier League chu June 17 zan aṭangin khelh ṭan a ni leh tawh dawn a, Covid-19 vanga March 13-a league tihtawp lailawk a nih hnuah inkhel en tur kan nei leh dawn ta tihna a ni. 

Covid-19 vangin entu awm loa league match khelh a ngai dawn a, Premier League club tan chuan hei hi thil thar a ni a. Season chhunzawm leh huna harsatna an tawh loh nan English top flight club-te hian an stadium-ah friendly match an khel ṭan. 

Old Trafford-ah Manchester United chu team hnihah an inṭhen a, home team anga khel lam chu Harry Maguire-a captain-na hnuaiah khelin away team lam chu Bruno Fernandes-a'n a ho thung. March 8-a Manchester City an hneh hnua an muala an inkhelh leh hmasak ber a ni. 

Hliam vanga rei tak an chawlh hnuah Marcus Rashford leh Paul Pogba pawh United jersey hain an inlan ve leh ta a, player pahnih hi Maguire-a team lamah an khel - Fernandes-a team lamah hian  player langsar zingah Juan Mata, Anthony Martial leh Aaron Wan-Bissaka-te chu an khel thung. Red Devils hian June 19 zanah Tottenham Hotspur lenchilhin chawlh hnua an match hmasa ber an khel ang

. 

Frank Lampard-a enkawl Chelsea chuan team dang sawm loin Stamford Bridge-ah kawr pawl leh a var haa inṭhenin match an khel a, Lampard leh a coaching staff-ten inkhel-ah hian referee hna an thawk. Chelsea hian June 21 zanah Aston Villa lenchilhin chawlh hnua an match hmasa ber an khel ang. 

Villa pawh hian Championship-a pahnihna ni mek West Brom chu Villa Park-ah mikhualin friendly match an khelhpui a, 2-2 in an inhnehtawk. Baggies tan Kamil Grosicki leh Filip Krovinovic ten goal khungin vawi hnih ngawt hma an hruai a, mahse Villa hian Jack Grealish leh Keinan Davis hmangin an sut ve ve. 

Newcastle United pawhin team dang sawm loin an mual St. James' Park-ah team hniha inṭhenin match an khel a, 1-1 in inkhel a tawp. Serthlum rawng jersey ha lam team tan Joelinton chuan hmahruaina goal a khung a, Magpies jersey a dum leh a var inchawhpawlh kawr ha lam tan Nabil Bentaleb chuan si phurh a sut.

Kar hmasa lam khan Premier League hmahruaitu Liverpool chuan Anfield-ah match neiin anmahni team chhungkua an lo intum tawh a, Norwich City leh West Ham pawhin an mualah match an khel ve bawk - Arsenal chuan Championship lama talbuai mek Charlton Athletic chu 6-0 a sawpin friendly match an lo khelhpui tawh bawk.