Argentina tan Messi leh a ṭhiante inlan dawn

Lionel Messi leh amah anga Paris Saint-Germain player pahnih Angel di Maria leh Leandro Paredes te chuan Argentina team an zawm fel tawh. La Albiceleste hian Zirtawpni zing dar 5:30 hian World Cup qualifier khel turin Venezuela an lenchilh ang.

Brazil pawhin Zirtawpni zing dar 6:30-ah Chile an lenchilh dawn. Brazil leh Argentina te hi September 5, Pathianni zan dar 12:30 hian an inkhel zui dawn - South American ram lian pahnih ten theihtawp an chhuah dawn.

Messi telna
Copa America khelh zawh takah Messi hoin Argentina an champion a, tuna an hmachhawp lian ber chu nakkum tawp lama khelh tur Qatar World Cup a ni. Messi-a'n PSG a zawm dawn pawhin an inremnaah an ram kohna a ngai pawimawh ang, tih a tel hial.

Club lama hlawhtlinna tinreng chang tawh Messi-a'n ram tan hlawhtlinna lian dang chan leh a duh tih a chiang. Argentina pawhin a vawi thum nana world champion nih ngei an tum a, qualifier aṭangin thapui an thawh nghal.

Premier League club lian ten an player an chhuah phal loh laiin, Aston Villa keeper Emiliano Martínez, Emiliano Buendia leh Tottenham defender Cristian Romero te chu ram team-ah an awm fel der tawh a, hripui leng karah pawh theihtawp an chhuah lui.

Lionel Scaloni enkawl team hi qualifier match ruk an khelh tawhah vawi thum an chak a, ṭum thum chu an khingpui nen an inhnehtawk - point 12 hmuin pahnihna an ni mek a, a hma thei angin World Cup khel tura tlin an tum ang.

Argentina khingpui tur Venezuela hi Copa khelh dawnah khan hri leng vangin an buai a, an ṭhat dan berin inelna an hmachhawn thei lo. Tunah erawh an player ṭhate nen an khel thei tawh dawn, vawi khat chauh la chak an nih avangin anmahni mualah chak ngei an tum dawn.

Brazil an buai?
Tite enkawl Brazil hian World Cup qualifier an match hmasa parukah buaina an nei lo - an chak fai vek. Point 18 hmuin hmahruaitu an ni a, inelna lian hmachhawn turin an tlin ngei pawh a rinawm, mahse kawng zawh tur erawh an la nei thui.

An match hmasa lamah kal vung viau mah se hri leng vangin Brazil hi harsatna tawk thei dinhmunah an ding. Premier League club ṭhenkhatin an player chhuah an phal miau lo a, an kohsa khel thei lo tur an tam avangin player pakua ngawt koh thar an ngai hial.

World champion hi an player dinhmun thlir chuan an ṭhat lai ber a ni lo. Mahse, coach Tite an nei miau a, a kaihhruaina hnuaiah hian khelh dan phung nghet leh ṭha tawk tak an nei, 2015 hnu lamah phei chuan World Cup qualifier-ah hian tlawm an la nei leh lo.

An chak loh hnuhnung bera an ngam loh chu Chile an ni a, anmahni ang bawka team huaisen hi tun ṭuma an hmachhawn tur chu an ni. Chumi hnuah Copa America final-a an ngam loh Argentina an hmachhawn dawn avangin a zawna chak lo thei dinhmunah an ding.

Alisson Becker, Ederson, Thiago Silva, Fred, Fabinho, Douglas Luiz, Roberto Firmino, Gabriel Jesus leh Richarlison te an tel dawn lo. Kum 38 mi Dani Alves leh kum 35 mi Hulk an ko hnuhnawh hial a, forward ṭha Neymar a la awm bawk avangin beisei erawh an nei thei ang.