Nepal tum a harsa ṭhin - Chhetri

Indian football team captain Sunil Chhetri chuan vawiin tlai dar 5:15-a Nepal nen friendly match an khelh hunah awlsam taka chak a beisei loh thu a sawi a, India-in holam taka an match khelh tur chu an thlir a hlau.

Mi tam takin Indian football player ropui ber ang hiala an ngaih Chhetri chuan, "Nepal hi team ṭha tak an ni a, a bik takin kan inhmachhawnin an khel ṭha thei hle," a ti a, a ṭhiante chu fimkhur turin a chah.

Nepal player zingah defender Rohit Chand chu en bik tur a ni dawn. 2010-12 season-a Indian club HAL SC tan pawha lo khel tawh defender hi Indonesian club Persija Jakarta tan a khel mek a, kum 2018 khan Indonesian top flight league Liga 1-ah Most Valuable Player a ni thei.

South Korea aṭanga inzir chhuak winger Manish Dangi hming lam hmaih a thiang lo a, kum 19 mi winger hi Nepal club ṭha Machhindra FC tan a khel mek a, India tlarhnung tana buaina thlen turin a ṭha tawk.

Kum 23 mi Anjan Bista pawh hian Nepal-ah chuan ngaihven a hlawh viau - an ram club Manang Marshyangdi Club-ah a khel mek a, India lakah hming chher a tum ang.

Nepal hi coach Abdullah Al Mutairi kaihhruaina hnuaiah hma an sawn nasa a, Kuwaiti coach kaihhruaina hnuaia khel team hi zuam sual theih an ni.

Blue Tigers leh Nepal hi vawi 19 an lo intawng tawh a, India-in vawi 13 hnehna an chang a, Nepal hi vawi hnih chakin vawi li an inhnehtawk thung.

June 6, 2017 kha team pahnih an intawn hnuhnung ber a ni a, Mumbai Football Arena-a inkhelah hian Sandesh Jhingan leh Jeje Lalpekhlua goal hmangin India hi 2-0 in an chak.

India hian Thawhṭanni tlai khan Nepal khawpui Kathmandu an thleng tawh a, he squad-ah hian Mizo pakhat Lalengmawia (Apuia) a awm ve bawk - ISL player man to ber hi a inlan dawn leh dawn loh sawi lawk theih a ni lo.

Blue Tigers hi September 5, tlai dar 5:15-ah Nepal nen hian an inkhel leh dawn a, October-ah SAFF Championship inelna chu an hmachhawn dawn bawk a ni.

India inkhel hi television lamah pekchhuah a ni dawn lo a, Indian national team facebook page lamah live-in a en theih thung ang.

India Squad
Goalkeepers: Amrinder Singh, Dheeraj Singh Moirangthem, Gurpreet Singh Sandhu
Defenders: Pritam Kotal, Chinglensana Singh Konsham, Mandar Rao Dessai, Akash Mishra, Rahul Bheke, Subhasish Bose, Seriton Fernandes
Midfielders: Lalengmawia, Bipin Singh, Anirudh Thapa, Sahal Abdul Samad, Brandon Fernandes, Liston Colaco, Yasir Mohammad, Glan Martins, Suresh Singh Wangjam, Jeakson Singh, Pronay Halder
Forwards: Manvir Singh, Rahim Ali, Sunil Chhetri, Farukh Choudhary