India leh Kohli fiahin awm dawn

Vawiin tlai dar 3:30 aṭangin India leh England ten Test match vawi nga an khelh tura palina chu 'The Oval'-ah an khel dawn. Series-ah 1-1 in inhnehtawk mah se Three Lions hian third Test-ah mikhual hi innings khat leh 76 runs-in an sawp a, Virat Kohli hoten insiamṭhat an mamawh hle.

India chet chhiat chhanah Kohli an mawhpuh a, tun hmaa chesual thei lo ang maia vul ṭhin Men in Blue captain sawiselna a ri ṭan. Kohli-a'n century a siam hnuhnun ber chu November 2019 daih a ni tawh a, tun hnai innings 51-ah inelna chi hrang hrang T20, ODI leh Test-ah century a siam lo.

Chutihrualin record en chuan Kohli hi captain a nihin amah leh India an che ṭha zawk. Captain ni chunga Test match vawi 64 a khelhah chawhrualin 56.29 runs a siam pha a, an chak percentage pawh 58% a ni.

Kohli hian captain ni loin Test match vawi 31 a khel a, a run siam zat chu chawhrualin 41.13 a ni a, an chak percentage phei chu 35% a ni pha chauh. Men in Blue-in England ram ngeia Test series lak an tum a nih chuan a ni khatna aṭanga an chet ṭhat a ṭul ang.