Fan-te ngaihdana buai lo Kane

Tottenham Hotspur striker Harry Kane chuan nipui transfer-a Manchester City pan a tumna chu tlawlh mah se engkim ngaihtuah chunga thil ti a nih thu a sawi a, fan-te ngaihdanin a tihbuai loh thu a sawi bawk.

Kane hian Spurs-ah kum 2024 thleng cham turin contract a nei a, mahse, club chairman Daniel Levy nen tun nipuiah khan chhuak turin a thu phunga inremna an nei angah a ngai.

Mahse, Spurs chhuah-san a duh chungin London club hian Manchester City dawrna an pawm duh lo a, a tawpah England Captain hi Spurs-ah a cham.

Kane chuan, "A hma pawhin ka lo sawi fo tawh a, fan-te chuan ngaihdan an neih ve a thiang a ni. Mahse, a chang chuan thil zawng zawng thlen dan hi fan-ten kim chang takin an hre ṭhin lo.

"Ka ngaihdanah chuan engkim hre chungin thil ka ti a, tunah chuan engmah intihbuai tir loa ka hna thawh zel hi ka tih tur chu a ni mai," a ti.

Kum 28 mi striker chuan sawi zawmin, "Club-in ti tura min tih ang chu thuawih takin ka ti vek a, tunah chuan England tana inkhel turin ka awm leh ta," a ti a, hma lam hun a ngaih pawimawh ber thu a sawi bawk.

Kane chuan, "Thil tam tak sawi a awm tih ka hria a, mahse, ka hnaah ka rilru zawng zawng ka pe. Thil thleng zawng zawng kha club leh keima inkar a ni a, chutiang chu a ni reng ang," a ti.

England hian zanin dar 12:15-ah Hungary nen World Cup qualifier an khel dawn a, group I-a match thum an khelh tawhah point kua neiin hma an hruai mek.

Tun hnaiah Covid-19 vangin Premier League club-ten player-te ram tana fehchhuah tir duh loh thawm a awm a, mahse, zanina England zinna Hungary erawh UK sorkar hnuaia 'red list' a a awm loh avangin player tan harsatna a awm lo.