Boateng-a'n Lyon a pan dawn

Bayern Munich-in Jerome Boateng contract an pawhseisak lo a, FIFA World Cup nomawi chawi tawh player hi club nei loa nipui transfer hun a hman hnuah Lyon a zawm dawn. Kum 32 mi Boateng hian Ligue 1 club tan hian kum 2023 thleng atan contract a ziak niin sawi a ni.

Lyon manager Peter Bosz hian Bundesliga club Bayer Leverkusen leh Borussia Dortmund te a enkawl tawh a, Boateng hrechiangtu a ni. German defender hi Bundesliga club nen sawizawm a ni a, a unaupa Kevin-Prince Boateng khelhna Hertha Berlin hming ri ring mah se mak takin Ligue 1 club a zawm ta zawk.

Boateng hian club a neih loh avangin transfer hun tawpin a tibuai ve lo a, hemi a nih avang hian he thuziah lai pawh hian Lyon-in an player thar hi an tlangzarh lo.

Club nei lo zingah Franck Ribery, Serge Aurier, David Luiz, Jack Wilshere leh Hatem Ben Arfa te chu a langsar an ni.