Number 1 Barty a chak

US Open khelh laia hmeichhe singles number 1 Ashleigh Barty chuan fiahna a hmachhawn nghal a, set hloh thei dinhmunah ding hman mah se hloh loin a chak - Australian star hian Vera Zvonareva hnehin second round a inhlangkai.

Nimin zing Flushing Meadows, New York-a inkhelah Wimbledon champion hian 6-1, 7-6 (9-7) in hnehna a chang, set hnih chauh khel mah se match rei zawng hi darkar khat leh minute 28 lai a nih avangin a awlsam lo tih a lang.

Russian mi Zvonareva hian 2020 khan US Open final hial a lo khel tawh, sulhnu a neih ṭhatna hmun a nih avangin Barty pawh a chai thei viau. Amaherawhchu tun laia player ṭha ber a hmachhawn miau avangin atan chak a harsa.

Kum 25 mi Barty chuan, "Season hmasa khan hri leng vangin US Open hi ka khel thei lo, kuminah erawh a hmuna entu awm chung ngeiin ka khel thei leh ta a, a nuamin a hlim awm takzet," a ti a, nikum lama a inlan lo chu thutlukna dik a nih thu a sawi bawk.

Tokyo Olympic champion Belinda Bencic pawhin hnehna a chang. Swiss star hian Dutch player Arantxa Rus chu 6-4, 6-4 in a hneh. 2019 champion Bianca Andreescu chu Viktorija Golubic lakah 7-5, 4-6, 7-5 in a chak hram bawk a ni.

British tleirawl duhawm Emma Raducanu pawhin zinkawng ngaihnawm a chhunzawm. Qualifier lamah ṭha taka a khelh hnuin main draw-ah pawh a chak, kum 18 mi hian Stefanie Vogele chu 6-2, 6-3 in a hneh.

Wimbledon khelh zawh takah khan Raducanu hian khawvel a barakhaih tawh. US Open pawh a vawi khat khelhna a ni a, amah aia tawnhriat leh sulhnu nei ṭha zawk Vogele lakah a talbuai lo.