Flick-a enkawl Germany 'thar'

Zanin dar 12:15 hian Germany-in coach thar Hansi Flick-a hnuaiah an khel ṭan dawn a; St. Gallen, Switzerland-ah Liechtenstein nen World Cup qualifier an khel ang.

Euro 2020 zawhah Germany coach Joachim Low a chawl a, Bayern Munich-a hming chhertu Hansi Flick-a'n a thlak. Flick hian thla 18 chhungin nomawi pasarih a chawi a, Germany pawhin a chungah beiseina an nei sang hle.

Flick-a'n engtin nge team a rem dawn tih hriat a châkawm a, Bayern Munich-a a enkawl ṭhin player-ten hmun pawimawh an chan a rinawm. Chutihrualin Borussia Dortmund captain Marco Reus koh tel a ni a, bul a ṭan nghal erawh a rinawm chiah lo.

Euro 2020-a right back-a chhawr Joshua Kimmich pawh midfield-ah Leon Goretzka nen an inkawp a rinawm a, Germany right back-ah Lukas Klostermann emaw Ridle Baku emaw te an awm a rinawm.