Tawpna nia Chelsea zawmtu Saul Niguez

Chelsea chuan signed Atletico Madrid midfielder Saul Niguez chu season khat chhung atan loan-in an lalut a, loan a zawh hunah an duh chuan a nghetin an lalut thei ang.

Blues hian a tirah chuan Saul hi an lakluh theih an inbeisei lo nia sawi a ni a, khawthlang media-ten an tarlan dan chuan Blues hian loan fee an pek tel avangin Saul hi an lalut thei.

Kum 26 mi midfielder loan fee-ah hian Chelsea hian euro maktaduai 4-5 bawr vel an seng nia sawi a ni a, a loan zawh hunah London club hian euro maktaduai 35-in an la nghet zui thei ang.

Hetihlai hian Chelsea fan-ten lalut tawh ngei tura an inngaih defender Jules Kounde an lalut thei ta lo a, Sevilla chuan Blues hian an phalna ang zata an dawr loh thu an sawi.

Kounde hian a contract-ah euro maktaduai 80-a a chhuah theih thu a ziak tel a, hei aia tlawm zawka hralh an duh loh avangin Sevilla sporting director Monchi chuan Blues dawrna an hnar thu hi press conference-ah a puang a ni.

Blues hian Kurt Zouma chu West Ham-ah pound maktaduai 29.8-in an hralh tawh a, hei vang hian Kounde an lakluh ngei rinna hi a lian lehzual.

Mahse, transfer tawp niah rin loh takin Saul Niguez an lakluh thu an puang ta zawk a, Chelsea winger hlui Pat Nevin chuan, "Saul hi eng atana lalut nge an nih ka hrethiam lo a ni," tiin a sawi hial.

Kum 26 mi Saul hi Atletico Madrid aṭanga career ṭantu a ni a, Rayo Vallecano-ah loan-in a chhuak tawh tih loh chu club dang tan a la khel ngai lo. Atletico tan inelna hrang hrangah match 340 khelin goal 43 a khung a, assist vawi 20 a nei.

Diego Simeone hnuaiah hmun pawimawh a chang reng thin a, Chelsea a pan thut hian mak tih a hlawh ang reng hle - Blues-in N'Golo Kanté leh Jorginho an nei tih hriat tel phei chuan thutlukna mak a ni.

Mahse, Saul hian Atletico chu a duh reng vanga chhuahsan a nih loh thu a sawi. Spain international chuan, "Diego nen kan titi a, ka position pangngai ni loah season thum chhung ka khel tawh.

"Diego vanga tun dinhmun thleng ka ni a, club tana ṭha ber tur a ngaihtuah avang pawhin ka hrethiam. Mahse, kei chuan ka 'position' ni miah loah ka tang rei ta hretin ka hria a, chona thar hmachhawn turin Chelsea ka thlang a ni," a ti.

Saul hian defensive midfielder angin a hun tam zawk a hmang a, mahse, tlarhma lam pui tura tawlh hma hi hun rei tak aṭang khan a duh tawh nia sawi a ni - Thomas Tuchel-a'n a duhna hmunah chhawr a tum niin a lang.

Hetihlai hian Saul chuan Spain tana youth level-a a khelhpui ṭhin, Chelsea keeper Kepa Arrizabalaga chuan London club pan tura a hmin thu a sawi bawk a, "Kepa awm lo se thawnthu a danglam ang," a ti.

Chelsea hian Saul an lakluh laiin defender Ethan Ampadu chu Serie A club Venezia-ah loan-in an chhuahtir thung a, kum 20 mi Wales international hi loan-a an chhuah hma hian Stamford Bridge-ah kum 2024 thleng cham turin contract thar an ziahpui.