Kolkata club hma hun engtin nge?

Season thar ISL-ah chuan ATK tawp kan hmu tawh dawn lo a, I League-ah Mohun Bagan hming lam tur a awm tawh lo bawk ang.

 

January 16 khan ATK neitu RP-Sanjiv Goenka Group chuan Bagan-ah hian 80% share an lei a, Kolkata club hi ATK nena inzawmin season tharah ISL an khel tawh dawn. Mohun Bagan hi I League match khelh tur la awm nual mah se an champion chiang tawh a, ATK-in ISL nomawi an chawi bawk - Kolkata club-ten Indian football an thunun. Mahse, thu chiang lo awm ta chu hei hi a ni - club pahnih player zingah tu nge cham bang ang a, season tharah tuin nge ATK-Bagan enkawl ang a, club-in eng hming nge a put dawn? tih hi a ni. 

ATK leh Mohun Bagan an inzawm takah chuan eng club hming nge an put chhunzawm zel dawn tih chu zawhna awm a ni a, he thu buatsaih a nih thleng hian club pahnihin an hming tur an la tichiang lo. 

RPSG Group-in 80% share an neih miau avangin thu an nei zawk ang tih chu thil lang chiang sa a ni a, chutihrual chuan tuna ATK hming put mek hi a nihna takah chuan awmze nei lo hming a ni. ATK hi ISL ṭantirh khan Atletico Madrid nen an thawk dun a, hei vang hian club hmingah pawh Atletico de Kolkata tih a ni. Mahse, he thawh dunna hi tih tawp a ni tawh a, Kolkata club hian a hming hi a lam pum pawha dah tawh loin ATK an ti satliah. 

Hetiang a nih avang hian ATK hming paih boa Mohun Bagan hming an pu tawp a nih pawhin mak tihna tur a awm lo a, chutihrual chuan ATK-Bagan tih hming an put mai ringtu an tam hle. 

Bagan leh ATK ṭantu tam takte rilru buaina chu ATK neitu Sanjiv Goenka chuan a rawn ti chiang a, ISL-a a club champion puitu Antonio Habas chuan ATK-Bagan a enkawl chhunzawm tur thu a puang. 

Goenka thutlukna hian Bagan fans tam tak thinlung a ti na ang tih a chiang - I League nomawi chawipuitu Kibu Vicuna an ngaihlu a, an game enin Spanish coach hian kalphung a nei mumal zawk em ni aw, tih theih a ni. 

Habas hi coach ṭha tak ni mah se ATK-a player a neih dan theihnghilh loh a ṭha - season hmasaa Asia rama league sang ber pawl A League striker inkawp fuh Roy Krishna leh David Williams chu a rualin a nei thei. East Bengal chhuanvawr an chhuhsak Jobby Justin chu player naranah an chhuah a, Edu Garcia, Javier Hernandez leh Prabir Das te an neih bawk avangin Habas hi sum tam tak leh players ṭha nena thuam a ni tih theihnghilh loh a ṭha. 

Club neitu pa berin Habas a cham chhunzawm zel tur thu a sawi chiang tawh a, Vicuna hian Indian football-a chhuahsan mai ang em? tih chu zawhna dang lo piang a ni - a duh phawt chuan I League club enkawl chhunzawm tur a haihchham lo ang. 

ATK neitu Goenka chuan, "Vicuna hi coach ṭha tak a ni a, thil awm zel dan tur kan ngaihtuah ang chu," a ti a, Habas ber coach a nih chian tawh dawn avangin Vicuna hian ATK-a chanvo a chelh theih san ber chu assistant coach hna a ni. Kum 48 mi coach hi European club lar ni phak Legia Warsaw-a assistant coach lo ni tawh, Bagan a enkawl hmaa Polish top division club Wisla Plock kaihruaitu a ni a, I League champion nih hnua ISL club-a assistant coach nih a chak kher lo mai thei. 

Vicuna hian Bagan a pan tirh khan kum khat chhung atan contract a ziak hrim hrim a, ATK-in contract an zawrh leh I League-a sawmtu a neih dan a zirin Indian football-a kan hmuh chhunzawm dawn leh dawn loh chu a chiang ang. 

Players ve thung ATK hian season thar atan bazar a ṭan der tawh a, Mumbai City aṭangin left back Subhasish Bose leh FC Goa aṭangin striker Manvir Singh an lei belh der tawh!

Kolkata club squad neih dan hi ISL lamah pawh squad chhah bera chhal ngam an ni a, Indian player ṭhenkhatin hmun danga khelh phakna zawnga an chhuahsan a nih loh chuan an chhuahsan tam lo mai thei. Chuti a nih chuan Bagan player lam hma hun hi a chiang lo ber chu a ni ta tihna a ni a, Goenka chuan, "Naupang talent nei ṭhate chher kan duh a ni," tiin a sawi a, thil a chiang rih lo hle. ATK hian an foreigner neih ṭhatte an chelh ngei a rinawm bawk a, coach leh players-ah chuan season thar ISL-ah Bagan lam aiin ATK hlimthla tho kan hmu zawk dawn niin a lang. 

ATK jersey hi Atletico Madrid nen an inzawm laia Spanish club jersey rawng leh design mila siam a ni a, Bagan rawng hi 'Green and Maroon' (a hring leh rawng sen uk) niin hei hi anmahni insawi nan an hmang ṭhin bawk. 

Bagan fans tam tak chuan hun rei tak chhunga an lo kalpui tawh Green and Maroon mangṭha hi an harsat ang tih a chiang a, logo lamah buaina a la awm cheu bawk ang.

 

Mahse, Goenka hian Bagan-a lei tirh khan, “Ka pa RP Goenka kha Mohun Bagan member a ni a, Bagan nena inzawmna kan nei leh thei ta hi ka tan phei chuan a lunglenthlak lehzual hle a ni,” tiin a lo sawi tawh a, Bagan-in hun rei tak an lo kalpui tawh thilte hi a thlauh thlak tawp a rinawm loh. Engpawhnise, club pahnih hi June 1-ah club 'pakhat' an nihna angin an kal dun ṭan thei dawn a, chutih hunah chuan vawiina kan zawhna tam zawk hi chhansakin kan awm ang.