German Cup Saarbrucken-in final an thleng thei ang em?

German Cup chu zanin aṭangin khelh chhunzawm a ni dawn a, club pali chiah dam tawhin Bundesliga club pathum Bayern Munich, Eintrancht Frankfurt leh Bayer Leverkusen zingah fourth tier club Saarbrucken an tel.

Zanin dar 12:15 hian Saarbrucken-in Hermann-Neuberger-Stadion-ah Bayer Leverkusen an mikhual dawn a, club inthlau tak an inhmachhawn dawn avangin ngaihven a hlawh letling hle.

Saarbrucken hi Regionalliga Sudwest-ah an awm a, point ruka an san fal avangin champion-ah an puang tawh a, 3 Liga-a khel turin an inhlangkai tawh. Amaherawhchu inelna hi a tawp avangin Saarbrucken hi ni 94 chhung an inkhel tawh lo a, an khingpui tur Bayer Leverkusen erawh an ṭhat zawk bakah match fitness nei turin an khel leh tawh a ni.

Bayer Leverkusen hian an match hnuhnung berah Bayern Munich hneh lo mah se Saarbrucken nen an inthlauh avangin player ṭha ṭhenkhat an dah ṭha hial ang. Saarbrucken erawh league sang pathum pawna awm zinga semifinal lut hmasa ber an ni a, pressure an neih dawn loh avangin khelh an harsa dawn.

Saarbrucken hian semifinal thleng turin quarterfinal-ah Bundesliga club Fortuna Düsseldorf chu an hneh a, second round-ah pawh Bundesliga club tho FC Cologne an hneh tawh avangin an zin kawng duhawm tak chhunzawm turin beiseina an 

nei ang.