US Open khelh hun tih danglam tum rih lo

United States Tennis Association (USTA) chuan US Open khelh hun sawn tumna an la neih rih loh thu an sawi. French Open khelh hun sawn a nih avangin inelna lian pahnih hi a inhnaihchilh dawn hle.

US Open hi August 31 aṭangin New York khawpuiah khelh a ni dawn, inelna an neih zawh aṭanga chawlh kar khat hnuah French Open khelh chhunzawm nghal a ni ang - clay court inelna lian hi May 24 aṭanga khelh tur chu a hun an sawn a ni.

USTA chuan thu chhuah siamin, "Hri leng do kawngah khawvel a inpumkhat lai a ni a, tun hi midang nek buai dawrh khawpa lian thutlukna lian siam hunah kan ngai lo. USTA chu Grand Slam tournament dang ngaichangin a kal ang, WTA, ATP leh ITF bakah Laver Cup pawh a ngaichang tel ang," an ti.

French Open khelh hun sawn vangin inelna ṭhenkhat chu a nek buai dawn. A nek buai tur zinga mi Laver Cup chu an ruahman sa anga an kal tlang tur thu an lo sawi ve tawh bawk. Tennis season kal laia Grand Slam khelh tur zingah Australian Open chiah an la khel, French Open leh US Open pawh kaltlangpui an tum. Grass court inelna lian ber Wimbledon chu July thla a khelh ṭhin a nih avangin tun hnaiah thu thar an nei rih lo.