NECS Cup Final : Ramhlun South laka phuba lak tum Chanmari
Tualchhung football ngaina veng pahnih Ramhlun South leh Chanmari ten vawiin chawhnu dar 2:00 hian Lammualah XTECH-NECS Cup 2018 final an khel dawn. Inkhel thiam veng pahnih ten ropui zawk nih an inchuh tur hi a hmuhnawm dawn.
Nikum CYMA football final-ah veng pahnihte hi an intawng a, Ramhlun South lamin Lalawmpuia goal khat hmangin hnehna an chang. Coach Samson Ramengmawia'n hnehna an chan nawn theih a rin thu Vang-laini a hrilh a, Chanmari coach Lalengzauva erawhin an hneh lêt theih a beisei thu a sawi thung.
NECS Cup hi quarterfinal lut pariatte group pahnihah ṭhen niin, an inkhelh kual hnuah a sang paliin semifinal an lut. Quarterfinal-ah Ramhlun South leh Ramhlun South te hi 1-1 in an inhnehtawk tawh a, an inhlau lo tawn khawp ang.
Rinkai Ramhlun South
Veng leh veng inelna a nih tawh chuan Ramhlun South hi engtik lai mahin team chhia an ni ngai lo. NECS Cup vawi ruk buatsaih tawhah vawi li final lutin vawi hnih an champion a, ṭum hnih dang chu semifinal leh quarterfinal an thleng bawk - inkhel boruak sang tawng ṭhang an nih avangin final-ah pawh an buai a rinawm loh.
Ramhlun South hian Santosh Trophy khelh vangin midfielder Lalromawia an chhawr thei tawh dawn lo, Romawia hian quarterfinal-a an intawn ṭumin an si phurh a sut. Samlukhai rawlthar hi awm tawh lo mah se Samson-a tan tlarhma lamah buaina tur a awm lo ang.
India Junior team-a tel tawh Lalremruata an nei a, player beiseiawm leh tun inelna bika che ṭha fal tak R. Lalthanmawia an nei bawk. Amawia hian goal riat a khung tawh. India leh Mizoram tana feh chhuak tawh Lalnunmawia leh Vanlalthlamuna te unau an la awm bawk avangin Chanmari tlarhnung tan thawhrim a ngai dawn.
Shillong Lajong captain hlui Samson-a chuan, "Mahni goal venhim nana ṭha tak chu khingpuite nawr beh hi a ni a, final-ah pawh kan theih tawpin Chanmari kan nawr dawn. Training-na hmunah pawh attacking game kan zir nasa a, goal khat aia tam khung kan tum dawn," tiin Vanglaini a hrilh.
Ramhlun South tlangval Samson hian nikum khan player ni chungin an veng hi YMA football-ah a champion pui a, inkhelh a chawlhsan zui bawk. Kuminah an veng team enkawlin a rawn inlan leh nghal a, player a nih lai aṭanga a hriat chian tawh an veng ṭhenawm Chanmari lakah hnehna hlado chham nawn an tum hle.
A rei ta lua...
Chanmari hian Durtlang hnehin a hun laia inelna ngaihhlut Red Ribbon Football 2012 nomawi an chawi a, veng leh veng inelna bika an champion hnuhnung ber aṭangin kum ruk a ni ta - nomawi an chawi lohna a rei ta. Nikum khan YMA football-ah final thleng mah se Ramhlun South an ngam lo.
Chanmari coach Lalengzauva chuan, "Chak loh nawn kan tum lo, player tawnhriat nei leh rawlthar rual kan inchawhpawlh ṭha tawk a, hnehna chan let ngei kan tum a ni," tiin Vanglaini hnenah phuba lak an tum thu a sawi.
A zawna match li chhung goal khung thei Jerry Mawihmingthanga an neih avangin Chanmari hi an hlauhawm dawn, Jamshedpur FC forward Jerry-a thlawp tur hian goal thum khung tawh Lalnunzama an nei bawk.
Mizoram tan defender rinrawl Lalrinchhana Tochhawng leh C. Lalmuanawma te an fehchhuah tawh vangin an tlarhnung an pan deuh tura ngaih a ni. Mahse, semifinal-ah goal nawr na tak Bawngkawn an hneh ṭumin an tlarhnung an ding khawng.
Chanmari hian tlarhnungah rawlthar B. Lalramchhuana leh Lalhminghlua te chungah rinna an nghat ngam a, Aizawl FC defender Lalhriatrenga (Achia) an nei bawk. Position hrang hranga chhawr theih Rosangliana chu goal venhim hna thawk tura pawh let theih bawk avangin, midfielder Rochhingpuia chu tlarhma pui turin a chhuak tam thei deuh tura ngaih a ni.
Mipui lam
"Aw Ramhlun, ka ram Ropui..." tiin Ramhlun South mipui ten an veng team an au phur tawh ṭhin a, vawiin hian K. Kawla Stand-ah an inhawr khawm ang. An veng ṭhenawm Chanmari aia kalkhawm hnem an tum dawn a, kawr sen ha an tlem dawn lo.
Football ngaina veng Chanmari hi nomawi chawi chakin an tuihal, an player-te au phur turin veng chhung mipui an thawk chhuak hnem ang. Player 12-na te hi Zomuanthanga Stand-ah an awm khawm dawn, awmze neia au a pawimawh ang.
Tun hnai tualchhung football-ah Chanmari leh Chhinga Veng an inel a; Chhinga Vengin coach Lalsangzuala Hmar an chhuhsak hnuah MPL bakah I Day Football, MFA Super Cup leh MPL U18 nomawi te an chawi. Chanmari lamin a chhan let nan MFA Futsal League hmasa ber final-ah an hneh a, NECS Cup nomawi an chawi leh chuan an thinlung hliam hi eng emaw chen chu a thawi dam thei ang.
Final Kalkawng
Ramhlun South
Ramhlun South 3 - 0 Saitual
Ramhlun South 5 - 1 Muallungthu
Ramhlun South 8 - 1 Darlawn VC I
Quarterfinal
Ramhlun South 1 - 1 Chanmari
Bethlehem Vengthlang 0 - 4 Ramhlun South
Chhinga Veng 0 - 2 Ramhlun South
Semifinal
Ramhlun South 3 - 1 Electric Veng
Chanmari
Chanmari 5 - 1 Sihphir
Bethlehem Veng 2 - 2 Chanmari
(Penalty shoot out-ah Chanmari 5-4 in an chak)
Chanmari 6 - 2 Durtlang North
Sihphir Venghlun 0 - 3 Chanmari
Quarterfinal
Ramhlun South 1 - 1 Chanmari
Chanmari 2 - 1 Chhinga Veng
Bethlehem Vengthlang 2 - 3 Chanmari
Semifinal
Bawngkawn 2 - 3 Chanmari