Zarkawt BCA an nui hmasa

Mizoram Super League season lina final game 1-ah Zarkawt BCA chuan 75-68 in an hnehna an chang a, Tuikual South-in hun tawp lama an khelh dan hmangin tlawm mai an la tum lo tih an lantir. Zanin dar 8:00 hian final game 2 khelh a ni dawn a, Tuikual South an tho chhuak thei lo a nih chuan Zarkawt-in MSL nomawi an hawn ang.

Boruak a sang
An sawi lawk angin Tuikual South thawm a lian nghal a, Zarkawt lam an duai bik si lo. TKS coach KC Lalliantluanga'n starting five-ah tawnhriat nei ṭha F. Zodinthara leh captain Lalmuanpuia Zote te chiah a thlang.

BCA coach Lalruatfela'n rin loh takin Jackson Lalrintluanga luhtir mah se Chawnpui tlangval hian tawnhriat a ṭha a, coach lawmna siamsaktu a ni. MSL3 nomawi chawitu Lalrina Rentlei, Matthew Sailo, Zonunsanga leh Lalremsanga ten bul an ṭan bawk. Kum lama naupang Zonuna leh Reema te an kum aṭanga thlir chi an ni lo a, tawnhriat nei ṭha tawh tih a lang.

Boruak sangah tawnhriat nei tlem zawk Tuikual South an talbuai a, first quarter-a an inthlauhna zat chu 24-11 zet a ni. Second quarter-ah pawh point 23 ten an inthlau chho a, halftime-ah 44-23 a ni a, champion tur a chiang tawh.

BCA an thiam
Zarkawt BCA-in MSL4-ah match kua an khel tawh a, point 705 lut tawhin match tinah point 78.33 lut ang an ni. Afela hote chuan final game hmasa bera point 75 an hmuh hian an average an la pha lo a, hei aia ṭhaa khel turin theihna an la nei cheu.

TKS nena an danglamna chu Mission Veng Vikings champion puitu Lalrina'n bul a ṭan ṭha a, Tuikhuahtlang tlangval khawih apiang chu 'rangkachak' ah a chang ta emaw tih mai tur a ni.

Lalrina (15 pts) bakah Dennis Lalmuanpuia (18), Zonunsanga (16) leh Lalremsanga (10) ten point 10 an lut tling vek a, Matthew Sailo pawhin point ruk chauh nei mah se a lenna avangin TKS tan a hnawksak pha hle.

BCA hi rebound-ah pawh an chungnung a, 3-point vawi kua zet an lut. Freethrow pawh vawi 16-ah vawi 10 lutin fourth quarter-ah vawi rukah vawi ruk an lut a, an phu ang ngeiin game 1 an la.

Ṭan tluan a har
Zarkawt BCA coach Lalruatfela chuan, "Bul kan ṭan ṭhat avangin kan inthlahdah a, tihsual tam tak kan nei a ni. Player-te ka dem thei lo a, a chhan chu kan point dinhmun a ṭhat tawh vang a ni," tiin hun tawp lama an talbuai chhan a sawifiah.

Afela chuan sawi chhunzawmin, "Game 1 hi a tawpna a ni lo a, game 2-ah zawhtir kan duh a, inthlahdah a thiang lo," tiin zanin ngeia champion an tum thu Vanglaini a hrilh.