Ryan Giggs fuihtu Lippi

Marcello Lippi chuan Ryan Giggs-a'n an ram Wales football team chu hlawhtling taka a enkawl chhoh theih a rin thu a sawi a, Sir Alex Ferguson tih dan entawn se a duh thu a sawi bawk.

Wales hian vawiin tlai dar 5:05 hian China nen China Cup an khel dawn a, Manchester United winger hlui Giggs-a'n a ngheta Wales a enkawl hnua a match hmasa ber a ni ang.

Kum 69 mi Lippi chuan, "Giggs hi ka tan thurawn pek a ṭulna ka hre hran lo, Manchester United-ah khan manager ṭha ber Sir Alex Ferguson a nei a, ani hnen aṭanga a zir chhuah kha a hmang chhuak mai turah ka ngai," tiin Giggs chu United manager hnen aṭanga a tawnhriat hmang turin a ti.

Italian manager Lippi hian an ram chu World Cup a champion pui tawh a, khawvela manager tawnhriat ngah leh sulhnu nei ṭha berte zinga mi a ni. Kum 2016 October thla aṭang khan China a enkawl ṭan a, manager a nih hnuah team 16 zet a enkawl tling tawh a ni.