Mizoram tan inkhel pawimawh
Santosh Trophy vawi 72-naah vawiin tlai dar 3:00 hian Mizoram chu match hmasa bera Punjab laka vanduai Odisha nen Rabindra Sarobar Stadium-ah an inhmachhawn dawn. Group B inkhel dangah Karnataka leh Goa-te Howrah Stadium-ah an inkhel bawk ang.
Vawiin hian Mizoram ang bawka point thum hmu tawh Punjab an awl a, hei hi Lalsangzuala Hmar hote tan dinhmun insiamṭhatna hun ṭha a nih theih rualin chet sual theihna a ni a, inkhel pawimawh a ni.
Thih leh dam
Odisha-in an match hmasa berah Nain Suna hmangin hma hruai mah se Punjab-in an lehthal a, defender Rudra Pradhan-a'n an lama a tih luh avangin coach Mohammed Salim a hote hi an vanduaiah a ngaih theih.
An match hmasa bera point an hmuh loh avangin Odisha tan semifinal lut turin point thum hmu tawh Mizoram an hneh a ṭul a, beiseina nei lai an nihna tak hi Sanga hote tana a harna tur a ni.
Mizoram lam...
Mizoram manager Hmingthansanga chuan, "Player inhliam kan nei lo a, dam chiang lo deuha Kolkata pan Rammawia leh keeper Andrew-te pawh an dam ṭha tawh hle," tiin a sawi.
An match hmasa ber chungchang sawi letin Hmingsanga chuan, "Kan practice-na hmun aiin kan khelhna hmun a chhe zawk a, chu bakah kan thlenna hmun aṭanga stadium a hlat avangin eng emaw chenah chuan harsatna kan nei bawk. Amaherawhchu hetiang buaina pumpelh duh hian Kolkata kan thleng hma a, Odisha kan hmachhawn hunah pawh kan tawnhriat hi kan hmang ṭangkai thei ang," tiin Vanglaini a hrilh.
Mizoram vawiin hian Thawhṭannia Goa an hnehna hmun Rabindra Sarobar Stadium-ah bawk an khel ang.
Chanchin ṭha
Mizoram match hmasa berah Lalbiakhlua a khel ṭha a, Mizoram Police winger hian nikum Santosh Trophy final round-a beisei a phak loh hnuah tun hmaa theihna ang kha a pholang leh meuh lo.
Goa nen erawh Biaktea hi goal hmasa pahnihah a inrawlh a, Santosh Trophy-a vawi khat inlanna Samlukhai tlangval Lalromawia'n goal hnih a khung bawk a, an inringtawk sawt ang.
Group khata team nga an la awm avangin match hmasa ber chak hi ngaih ṭhatna tur a ni lo a, coach Sanga'n player enchhinna ni loin an ṭhat dan ber turin player a rem ang.
Inkhel pakhat zawk
Goa-in an match hmasa berah Mizoram an hneh lo a, India pawh lo enkawl tawh coach Armando Colaco chuan, "Khelmualah khan ka naute eng nge an tih ka hre lo, khatianga an khel dawn a nih chuan ka chhuahsan ang," tiin a lungawi loh thu a sawi.
Goa hian Karnataka an hmachhawn dawn a, anni hi qualifying round-a Services pet chhuaktu an nih avangin coach Colaco hote hi team ṭha zawka dah theih an ni lo.