Ka dam tawh - Djokovic

Novak Djokovic chuan kumin chhunga a vawi khat nan natna nei lo chunga a inkhelh ve theih tawh thu a sawi. Serbian tlangval hi Miami Masters-ah a inlan dawn a, Zirtawpni hian a match hmasa ber a khel ang.

World number 1 hlui Djokovic hi a kiu hliam vangin season hma­sa chawhnu lam aṭang khan a buai tawh. Nikum Wimbledon quar­terfinal aṭangin a inhnukdawk a, season bul ṭanna Aus­tralian Open-ah khan inlan ve mah se fourth round a paltlang zo lo. Kar hmasa a khelh zawh tak Indian Wells aṭang khan a inhnukdawk bawk.

Kum 30 mi Djokovic chuan, "A nihna takah chuan tun hnai deuh aṭang khan natna nei loin ka khel ve leh chiah, a hma kha chuan min kamtu a awm reng avangin rilru zawng zawng hman a har. Hun rei tak hnuah hetiang hun ka tawng leh thei hi a mak zawk," a ti.

Grand Slam vawi 12 champion tawh Djokovic chuan sawi zawmin, "Kum ruk chuang vel zet chu buaina harsatna nei loin ka khel hman a, player dangte pawhin hun harsa an tawh ang ka tawk ve a ni mai, hemi paltlang theite chu mi vannei an ni," tiin a sawi.

Mipa singles player ropui Roger Federer chu a khup leh hnungzâng na vanga a buai hnuah hlawhtling takin a rawn kir leh tawh a, world number 1 dinhmun luah lehin Miami Masters-ah pawh hian nomawi kawl mektu anih bakah champion tura rinkai a ni.