ISL thlirletna Tu nge hlawh hnem ber?

India rama football inelna ngaih­hlut hlawh ber Indian Super League khelh zawh a ni a, ṭum dang zawng aiin ISL club ten sum an seng nasa a, player hlawh a sang hle.

I League aṭanga ISL inpetkai Bengaluru FC-in club dang zawng aiin player hlawhah sum an ren lo ber a, player hlawh atana an sen zat ringawt hi vaibelchhe 16.6 bawr vel a ni. ISL club pakhatin sea­­son khata player hlawh leh club inrelbawl nana an senso hi vaibelchhe 20-30 inkar a ni tlangpui.

ISL pumpuia hlawh hnem ber chu Bengaluru FC striker Miku a ni a, Venezuela international hian season khatah nuai 326 a hlawh mek a, amah hnaih bertu Tottenham Hotspur striker hlui Robbie Keane chuan ATK-ah nuai 260 bawr vel a hlawh thung.

Chhetri a sang ber a...
Indian player zingah Sunil Chhetri chu hlawh hnem ber a ni a, Bengaluru captain hian season khatah nuai 150 a hlawh mek. India captain hnuaiah ram tana a kawppui ber Jeje Lalpekhlua a awm a, Chennaiyin FC striker hian kum khatah nuai 130 hlawh mekin a khelh ṭhat dan a zirin nuai 10 a dawn belh bawk.

Chhetri leh Jeje hnimhnai ve leh thei ber chu Kerala Blasters defender Sandesh Jhingan a ni a, kum 24 mi lek nichunga Indian defender 'hot' ber pawl ni thei hian season khatah nuai 120 hlawhin Mumbai City keeper Amrinder Singh nen an hlawh zat a in ang.

ATK midfielder Eugeneson Lyng­doh-a'n nuai 110 a hlawh a, Jam­shedpur FC rinrawl Anas Edatho­dika nen an hlawh zat a in ang. Indian player nuai 100 hlawh kai thei an tam lo a, Blasters forward CK Vineeth chuan nuai 100 hlawhin heti zat hlawh kai thei Indian player dang an awm tawh lo.

Keane aiah Miku
Miku-a'n nuai 326 lai a hlawh laiin Robbie Keane-a'n nuai 260 vel a hlawh a, hming langsar zawk Keane-a'n a hlawh tlem zawk - thil mak erawh a ni lo. A vanglaiin Keane-a'n Tottenham Hotspur leh Liverpool tan khel tawh mah se kum 37 mi a ni tawh a, a kum ang zat tan chuan a hlawh zat hi a la tam tham hle.

La Liga club Valencia leh Getafe tana khel tawh Miku erawh kum 32 mi chauh a la ni a, season hmasa lawkah Spanish second division club Rayo Vallecano tan a la khel a, Venezuela international a ni bawk.

Manchester United striker hlui Dimitar Berbatov-a'n nuai 234 bawr vel a hlawh a, hlawh tam pathumna a ni. Cameroon tana vawi 42 inlan tawh Achille Emaná pawhin hlawh a la la ve nual a, kum 35 mi Mumbai City midfielder hian nuai 195 bawr vel a hlawh. Hming langsar zingah Manchester United defender hlui Wes Brown chuan nuai 188 bawr lain a hlawh hnem thawkhat hle.

Jeje a langsar
Chennaiyin-a hlawh hnem ber Raphael Augusto-a'n kum khatah nuai 149 bawr vel a ak haw a, cham­pion team-a Indian player hlawh hnem ber Jeje aia a hlawh tamna hi nuai 19 chiah niin Hnahthial tlangval hian an club-a hlawh hnem lamah Brazilian midfielder tih loh hi chu tluk loh a nei lo. South Indian club hian player hlawhah vaibelchhe 13.46 an inseng.

ATK-in player hlawh atan vaibel­chhe 15.33 vel an inseng a, an club player hlawh hnem ber chu Keane niin Indian player an kawla hlawh hnem ber chu Eugene (nuai 110) a ni. Bengaluru-ah Miku a hlawh hnem ber a, Indian player-ah Chhetri niin goalkeeper Gurpreet Singh Sandhu chuan nuai 120 vel a hlawhah ngaih a ni bawk.

Delhi-in player hlawh atan nuai 869 bawr vel an seng a, Nigerian striker Kalu Uche chu hlawh hnem ber niin nuai 84 vel a hlawh a, Indian player zingah nuai 75 hlawhtu Pritam Kotal chu hlawh hnem ber a ni. FC Goa tan Spanish mifielder Manuel Lanzarote chuan nuai 192 hlawhin hlawh hnem ber a ni a, Narayan Das leh Pronay Halder ten nuai 58 hlawhin Indian player hlawh hnem ber an ni. Goan club hian player hlawh atan vaibelchhe 12.97 an seng.

Sum ngah JFC
Tata Steel ta an nih miau avangin an season hmasa berah Jamshedpur FC-in sum an ren lo a, player hlawh atan vaibelchhe 11.96 an seng. JFC player zingah nuai 136 hlawhtu Sameehg Doutie-a'n a hlawh hnem ber a, Indian player zingah Anas chu hlawh hnem ber a ni.

FC Pune City-in player hlawhah vaibelchhe 11.07 vel an seng a, player hlawh hnem ber Marcelinho-a'n nuai 211 hlawhin Indian player hlawh hnem ber Lalchhuanmawia Fanai-in nuai 45 a hlawh. Kerala Blasters-ah Berbatov chu hlawh hnem ber a ni a, Indian player zingah Jhingan chu ipte khat ber a ni thung.

Mumbai club-ah Emaná chu hlawh hnem ber a ni a, Indian player hlawh hnem ber chu Amrinder Singh a ni thung. Maharashtra club hian player hlawhah vaibelchhe 15.20 an seng. NorthEast United-ah player hlawh hnem ber chu nuai 121 hlawhtu Jose Goncalves a ni a, Indian player hlawh hnem ber Lalrindika Ralte-in nuai 50 a hlawh. Highlanders hi Delhi tih lohah chuan player hlawh atana inseng tlem ber an ni a, nuai 908 bawr vel an seng.

Mizo hlawh
Mizoramin ISL-ah player 17 an thawh a, Mizo player-te hlawh zawng zawng belhkhawm zat hi nuai 497.9 a ni a, hetah hian Daniel Lalhlimpuia hlawh chhut tel a ni lo.

Serchhip rawlthar hi Bengaluru tan khel mah se AFC Cup khel tura chelh a nih avangin a hnuah ISL squad-ah telh a ni chauh a, a hlawh chhut tel a ni lo.

Mizo player zingah mahni club khelhna ṭheuha Indian player hlawh hnem ber ni thei player pathum an awm a, Jeje Lalpekhlua, Lalrindika Ralte leh Lalchhuanmawia Fanai te an ni. Mumbai City defender Chhawnkima'n season laihawlah loan-in Aizawl FC zawm mah se ISL-a Mizo player hlawhah a hlawh hi chhut tel a ni.