Zaninah Pro VoLleyball league Hunthar Veng leh ITI Veng intawng dawn

Mizoram Volleyball Association hnuaia inelna lian leh ngaihhlut ber Pro Volleyball League khelh ṭan a ni dawn ta. Dar 8:00 hian R. Dengṭhuama Indoor Stadium-ah champion lai Hunthar Veng leh kai thar ITI Veng ten match hmasa ber an khel ang.

Pro Volleyball League vawi thum neihna tur a ni a, champion lai Hunthar leh TNT chu an la tel kim vek. Kum 2016 champion Anastasia-in a vawi hnih nan an khel dawn a, Durtlang North, ITI Veng leh Tuichangral te chu team thar an ni. Tuichangral hi Aizawl pawn aṭanga tel hmasa ber an ni nghal.

Inelna hi knock out a ni dawn lo, team parukte an inkhelh kual vek hnuah a sang paliin semifinal an khel ang. Team tinin inkhel tura khelmuala lut player paruk zingah Mizo panga an hmang ngei ngei tur a ni a, hnam dang emaw ram dang mi emaw pakhat an chhawr thei ang.

Hunthar an ṭha
PVL neih tawh hoah champion zawn thei an la awm ngai lo. Hunthar hian a zawna champion hmasa ber nih tumin hma an la a, zanin an khingpui tur lakah rinkai ni chungin an inlan ang.

Season hmasa lama an hlawhtlinpui Santhosh Kodakkal, Sarang S Lal leh Mizo player zinga ṭha ber lawmman dawngtu Lalbiakmuana te an kawl zui tawh lo a, chutihrualin an squad ti chak turin player thar an senglut ve bawk.

Haryana aṭangin India aiawha junior leh senior-a vawi kua khel tawh Sohan Kumar an la, ani bakah hian Punjab aṭangin India junior team captain hlui Ranveer an kawl bawk, Chennai aṭangin D Selva Prabhu an la nei tel cheu bawk–state pawn player-te hi ṭhatpui tham an la ni chiang.

Tualchhung player ṭha Remsangzuala an la kawl a, 3rd MAP player C. Laldawngkima leh Lalduhsanga te an lak bawk avangin team ṭha ber tia chhal ngam tur an la ni.

Hmel thar ITI
ITI Vengin volleyball an ngaina a, inelna sang hmachhawn tur hian playoff an paltlang. An season hmasa ber atan hian player 17 an ziah luh zingah state pawn player an awm lo; tawnhriat la nei lo rual an inlan dawn, an tan fiahna a ni ang.

Tualchhung player zingah pawh ITI hian anmahni vengchhung player an ngah a, an khelhna tur R. Dengṭhuama Indoor Stadium an hnaih bawk avangin mipui erawh an kal khawm hnem ang. ITI Veng mipui te an player tha ti chak tur leh Hunthar au zam turin an thawk chhuak dawn.

ITI player zingah C. Lalremruata chu tawnhriat nei ṭha leh an innghahna tur a ni ang. Tlangnuam Vengthar aṭanga an lakluh Remruata hi 3rd MAP leh IR tana khel tawh niin, player naupang leh tawnhriat nei tlem zawkte ho khawm chu a hna pawimawh a ni tel dawn.