Ireland hnartu Liam Kelly

Reading midfielder Liam Kelly chu Republic of Ireland tana khel turin koh ni mah se, kum 22 mi hian England tana inlan theihna remchang a neih beiseiin Ireland kohna hi a chhang duh lo.

Republic boss Martin O'Neill chuan, "Kelly hi England-a piang a nih avangin Three Lions tan a inlan thei a, hei vang hian England tana a la inlan theih beiseiin kan kohna hi a chhang lo a ni," a ti.

Kelly hian Republic of Ireland Under-18 leh Under-21 tan a lo khel tawh a, mahse senior team-ah a la inlan loh avangin England tan a la inlan thei a ni.

O'Neill chuan, "Liam hi message pawh ka thawn ngei a, text hmang bawkin min rawn chhang let. Ka dinna ni reng ṭhin chu ram tana a inlan leh inlan loh chu player kuta innghat a ni. England tana la inlan theih a beisei a nih chuan a thutlukna chu kan zahsak tur a ni," a ti.

Ireland hian Zirtawpni zan dar 11:00-ah Turkey nen friendly match an khel dawn a, World Cup khel lo tur team hi O'Neill chuan din thar tumin ram tana la inlan ngai lo player pariat ngawt a ko.