Schalke-in match 12 chhung chak an nei lo

Bundesliga-ah Schalke-in match 12 chhung chak hmel an hmu tawh lo a, chutihrualin Pathianni zana Union Berlin nen 1-1 a an inhnehtawk avangin match li an chak loh hnuah point an hlawh chhuak.

Pathianni zan inkhel dangah Wolfsburg-in Wout Weghorst goal hmangin Werder Bremen an hneh a, Augsburg leh FC Cologne te 1-1 in an inhnehtawk bawk.

Union Berlin mual 'An der alten Forsterei'-ah chak beiseiin Schalke an lenglut a, amaherawhchu mualneitu lamin an khung hmasa zawk. Minute 11-na lekah Robert Andrich-a'n a khung a, German midfielder hian tun season-a vawi 48 a shot-naah a goal hmasa ber a khung ve chauh.

Andrich goal khung tur siamsaktu Anthony Ujah-a'n hun ṭha a nei a, goal zawnah pet mah se Schalke keeper Alexander Nubel-a'n a dansak. Royal Blues-in an chance neih hmasak berah goal an khung a, Jonjoe Kenny-a'n minute 28-naah box pawn aṭangin ṭha zetin a pet goal.

Second half-ah Union Berlin defender Keven Schlotterbeck-a'n goal khung theihna hun ṭha nei mah se a khung loh avangin goal dang a lut tawh lo. Berlin leh Schalke ten Covid-19 vanga chawlh hnua inkhelh leh hnuah chak hmel an la hmu lo ve ve.

Royal Blues hian season chanve chhoah kha chuan Champions League khelh hial an beisei pha a, amaherawhchu January 18-a Borussia Monchengladbach an hneh hnuah chak hmel an hmu tawh lo.

Schalke hi an match hnuhnung 12-ah vawi sarih an chak lo a, vawi nga dangah an inhnehtawk. German club ṭha Bayern Munich leh RB Leipzig lakah 5-0 ve ve in an mualpho a, Borussia Dortmund lakah pawh 4-0 in an chak lo.

David Wagner-a hote hian kum 2020-ah result ṭha nei lo mah se season ṭantirh lama an chet ṭhat zarah 10-naah an awm pha tho a, relegate a hlauhawm loh.