Nick Pope zinkawng ngaihnawm Bawnghnute semtu kha England goalkeeper!

Burnley goalkeeper Nick Pope chuan England tana khel tura koh a nih chu a tun hma nun ngaihtuahin awihawm loh khawp a nih thu a sawi.

Kum 25 mi keeper hian rawlthar a nih lai chuan zing dar 4:00-ah bawnghnute a sem ṭhin–tunah erawh Netherlands leh Italy hmachhawn tur England squad-ah koh a ni a, si ban a nghak a nih pawhin a mak tawh lo ang.

Hmanah chuan...
Premier League-a a season hmasa bera Burnley keeper rinrawl ni mek hi a naupan lai chuan Ipswich Town-ah a inzir ṭhin a, mahse kum 16 mi lek a nih laiin Championship club hian an chhuahtir–non league club-ah a khel a, ei a hmuh nan hna dang a thawh kawp a ngai.

Pope chuan, "Zinkawng harsa tak a ni a, hna tam tak ka thawk kawp a ni. Next (thawmhnaw siamtu) company-ah ka thawk a, zing dar 4:00-ah bawnghnute ka sem kual ṭhin bawk a, hlawh a tam lo em em bawk," a ti!

League ropui lo
Pope hian Ipswich-in an chhuah zalen hnuah non-league club Bury Town a zawm a, kum 2011-ah Charlton Athletic zawm mah se non league club Harrow Borough, Welling United leh Aldershot Town-ah te loan-a khelhtir a ni.

Kum 2016-a Charlton aṭanga Burnley pantu keeper chuan, "League harsa leh khirh tak takah ka khel a, Essex and Suffolk Border League kan khelh lai chuan Bury Town reserves team-ah ka awm ṭhin. Kan khelh ṭhinna thingtlang khaw pakhat Little Oakley zawng chhuak tur phei chuan map a ngai a, mi 10 vel leh ui in kan inkhel an en ṭhin," a ti.

Ka phu a ni
Pope chuan, "Hmasawn tur chuan i khelhna apiangah i theihna i pholang tur a ni," tiin non-league a khelh lai pawhin a tih mai mai ngai loh thu a sawi–Pope hian September khan first choice keeper Tom Heaton inhliam vangin Premier League-a a match hmasa ber a khel ve chauh a, match 27 a khel tawh.

English keeper chuan, "Ka khelhna apiangah theihtawp chhuahin ka theihna ka pholang ṭhin a, England squad-a koh ka ni hi thil mak niin ka hre hran lo. Mahse, Three Lions tana inlan erawh ka beisei ngai lo a, kei leh ka chhung hnaite tan chuan hlimna vawrtawp min petu a ni," a ti.

Tu nge 1?
England squad-ah hian Pope bakah Everton goalkeeper Jordan Pickford, Stoke City keeper Jack Butland leh Manchester City aṭanga West Ham-a loan-a khel mek Joe Hart te koh an ni. Butland hian qualifier hnuhnung bera Lithuania an hmachhawn ṭumin si ban a nghak a, Pickford-ah November khan Germany lakah vengin Hart hi kum ruk chhung chu number 1 a ni tawh.

Three Lions coach Gareth Southgate chuan, "Inchuh tur a ni," tiin a phu apiang si ban a nghah tir tur thu a sawi a, Pope chuan, "Number 1 nih ka duh a ni. A bik takin World Cup-a ram team tana khelh chu a ropui dawn. Ka tan chuan hei hi chona thar a ni a, chona hmachhawn nuam ti mi ka ni," a ti.