Joshua-te inhnek hun sawn dawn

Anthony Joshua leh Kubrat Pulev-te world heavyweight title inchuha an inhnek tur chu sawn a nih hmel a, boxing  promoter Eddie Hearn chuan June 20-a inhnek tur hi July-ah an sawn mai theih thu a sawi.

 

Hearn hian an duh ber erawh June-a inhnek hram a nih thu sawiin, "July-a inhnek theih dan tur chu kan buaipui ngei a, kan duh ber erawh ruahman sa anga June-a neih mai hi a ni," a ti. Coronavirus-in infiam-na khawvel a nghawng na a, Premier League chu inkhel thei loin an chawl mek - Joshua te inhnekna tur hi Spurs khelmual a nih bawk si avangin an buai lo thei lo a ni. 

Boxer pahnih hi Tot-tenham Hotspur Stadium-a inhnek tura tih an ni a, Joshua hian WBA, WBO leh IBF belt a kawl lai te chu Pulev lakah hian humhim a tum dawn a ni. Joshua hian December khan Andy Ruiz Jr chu point-a hnehin Ruiz laka a lo hloh tawh WBA, WBO leh  IBF kawnghren te chu a nei let a, Pulev nena an inhnek tur hi a kaltlang thei a nih chuan September 2018-a Wembley-a Alexander Povetkin a hneh hnua United Kingdom-a a inhnek leh hmasak ber tur a ni ang. Pulev nen hian October 2017 khan Cardiff khawpuia Principality Stadium-a inhnek tura tih an lo ni tawh a, mahse Bulgarian boxer hi hliam vanga a inhnuhdawh hnuin Carlos Takam hmachhawnin 

a hneh.