Inkhel turin Messi a inpeih

Barcelona manager Quique Setien chuan a captain Lionel Messi hliam a dam thu a sawi a, coronavirus len hnua match hmasa ber an khelh hunah a inlan theih tur thu a sawi bawk - Mallorca a hmachhawn dawn tihna a ni.

Messi hi a malpui dinglam a hliam a, team training vawi hnih chu a zawm thei lo. Inrinni khan Nou Camp-ah mimal training a nei leh tawh a, tunkar chuan a ṭhiante zingah a training leh thei tawh ang.

Setien chuan, "Messi chauh hi hliam tenau nei a ni lo, player reng reng an hliam a dam tirh chuan mimal training neih hi chu kalphung pangngai a ni. Hun rei lote hnuah match pangngai khel turin a inpeih ka ring," a ti.

Kum 32 mi Messi hi nikum August leh September thla khan kar ruk chhung ngawt chu a chawn hliam vangin match a khel thei lo, tun season-ah hliam vangin buai deuh mah se match 31 a khelh aṭangin goal 24 a khung leh der tawh.

La Liga champion lai Barca hian an elpui Real Madrid lakah point hnihin hma an hruai mek a, an captain Messi bakah striker Luis Suarez hliam pawh a dam chhoh mek avangin beisei an nei sang hle.