Tokyo Olympic an kaltlang pui a rinawm?

International Olympic Com-mittee chuan kumin nipui laia neih tur Tokyo Olympic 2020 chu ruahman anga kaltlang pui theih an beisei. IOC member pakhat member Hayley Wickenheiser erawh chuan infiamna khawmpui lian nei tur hian 'an dâwn tawi lui' rih deuh niin a hria.

Japan Olympic Minister Seiko Hashimoto leh Prime Minister Shinzo Abe te chuan Olympic hi tluang taka thlen theih an beisei thu an lo sawi tawh thung, hri leng mek coronavirus vangin khawvel chiai mek mah se tun thleng chuan an thil tumah an la dingnghet. 

International Olympic Com-mittee (IOC) chuan, "Tun hi hun dang nena khaikhin theih a ni lo, ruahmanna ṭha chungchuang bik kan mamawh. IOC chuan player-te a nghawng ṭha lo nei thei thil kan duh lo a, chutih rual chiah chuan an hrilselna kan ngai pawimawh bawk.

"A nihna takah chuan eng thutlukna pawh ni se duhthusam chu a ni thei rih lo ang, hei vang hian a ṭha ber a lo chhuah theih nan kan phak tawkah ngun takin ngaihtuahna kan hmang," an ti.

March 17, Thawhlehni khan International Olympic Committee (IOC) chuan Tokyo Olympic leh hrileng chungchang an ngaihtuah a, Japan khawpuia thil thleng tur chungchangah hian thutlukna nghet leh kaltlangpui ngei tur an la siam thei mai lo.

IOC chuan, "February thla laihawl aṭang khan nitin zantin maiin kan lo ngaihven tawh. A zir chiang tur kan din a, anni bakah hian World Health Organization (WHO), Tokyo 2020 Organising Committee, Japanese thuneitu leh Tokyo Metropolitan Government te nen ngun taka inbiak pawh reng a ni," an ti.

Infiamna hrang hrang chawlh lailawk mek a ni a, ruahmanna hmasaah chuan March leh April hi qualifier tam tak khelh hun tur a ni. Tunah hian infiamna hrang hranga Olympic khel tur zingah 57% chu an tling chiang tawh, a bak 43% chu hnawh khah a la ngai thung.

IOC President Thomas Bach chuan, "Tokyo Olympic neih tura inhnamhnawih zawng zawngte hriselna dinhmun chu kan ngaih pawimawh ber a ni. Olympic chhungkua kan ni a, hun nuam leh harsatna hmunah kan in thlawp tawn 

ṭhin. Player, coach leh team zawng zawng an himna turin hma kan la ang," a ti.

Tun dinhmuna a lan dan chuan Tokyo Olympic hi an kaltlang pui hmel a, chutih rualin Bach thusawi aṭanga a lan dan chuan Covid-19 hi a darh zel a, thunun theih baka a awm reng a nih chuan kaltlang pui luih pawh a ni kher lo thei bawk.

International Olympic Committee member Hayley Wickenheiser chuan, "Tuna khawvel buaina hi Olympic aiin a lianin ngaihven a hlawh zawk tih chu kan hre vek. Kan hma darkar 24 lo awm turah hian eng nge lo thleng dawn tih kan hre lo. Thla thum lo kal leh turah pawh eng nge rawn thleng dawn tih kan hre chuang lo," a ti.

Canada tana ice hockey bika Olympic gold medal pali la tawh Wickenheiser chuan sawi zawmin, "Infiammite thlirna aṭangin ka thlir a, tunah hian tlumtea thlir taka an lo thlir tawh chu holam taka thamral mai thei dinhmunah a ding mek.

"Infiammiten inbuatsaihna an kalpui thei lo a, entu pawh an zin kual theih loh bakah sumdawnna pawh a remchang rih lo. Mihring zalenna leh hlutna kan thlir tur a ni a, chutih rual chiah chuan a phena player awmte dinhmun hriat a ngai ve bawk. Ka hmuh dan chuan IOC hian harsatna lian zawk thleng thei mah se kaltlangpui a tum niin ka hria," a ti.

Tokyo Olympic hi a hun sawn emaw ṭhulh emaw pawh lo ni ta se nghawng a nei lian dawn, hriselna bakah sum leh pai lamah pawh nghawng a nei na dawn hle tih chu thil chiangsa a ni. A huna neih tlang duh an awm laiin sawn hlat duhtu pawh an awm bawk.

Spain Olympic Committee president Alejandro Blanco chuan, "Nitin mai hian thu thar duhawm lo lam hlir kan la hre rih chu a ni a, inelna hi ruahman dan pangngaia a kaltlang a nih chuan a lawmawm loh ang. Kan infiammite chuan tunah chuan training pawh an nei mumal thei lo.

"Olympic hi neih ngei kan duh, mahse venhimna lam ṭha zawk ni se. Inelna neih hmain thla li chauh a awm tawh a, tuna a lan dan chuan kan innfiammite chuan an nunphung pangngai ang chuan inelna an hmachhawn ve thei dawn lo," a ti.