Double champion Ramhlun South
Ramhlun South-in CYMA Football 2017-ah Chanmari hnehin nomawi an chawi a, XTECH-NECS Cup 2018-ah Chanmari bawk hnehin an champion.
Veng leh veng football inelna lian pahnih nomawi kawltu Ramhlun South-in Mizoram football history-ah hmun pawimawh an chang.
Nimina Lammual inkhelah hian R. Lalthanmawia'n goal awm chhun a khung a, Ramhlun South tlangval Amawia hian tun inelnaah goal kua khungin top scorer a ni a. Chanmari tlangval rangkachak Rochhingpuia chu best player-a thlan a ni.
Intluk tawk
Chanmari-in phuba lak ngei tumin an player neih ṭhat Jerry Mawihmingthanga, Rochhingpuia, Lalnunzama leh Rosangliana te bul an ṭantir vek a, Ramhlun South pawhin sa huai an ser nghal.
Coach Samson Ramengmawia'n bul ṭan turin Lalnunmawia leh a naute pahnih Vanlalthlamuana leh Eric Pazawna bakah Lalmawizuala, Amawia leh Lalremruata te bul a ṭantir vek.
Chanmari lamin bul ṭan ṭha zawkin Khelo India best player Zama goal khung tur chu Ramhlun South keeper Hmingthantluanga'n a dan sak a, ISL lama Jamshedpur FC forward Jerry-a'n goal khung theihna hun ṭha a hlah bawk.
First half-a chance ṭha ber erawh penalty a ni a, Chanmari player Simon Lalremruata handball vanga Ramhlun South penalty hmuh chu Eric Pazawna'n goal-ah a chantir lo.
Amawia a mawi
Ramhlun South-in halftime an hmang ṭha a, second half ṭantirh aṭangin inkhel an thunun nghal. Mizoram junior team tana khel tawh Amaawia'n goal ban a pet per nghal a, India junior team tana khel tawh Remruata goal khung tur chu Chanmari keeper MS Dawngliana'n ṭha zetin a dang.
Samson-a'n inkhelh ṭan hmaa 'attacking football' kan khel ang a tih chu a nauten an bawh zui a, inkhel an thunun rah sengin Amawia'n minute 71-naah a tauh lut a, goal dang luh belh lohin Ramhlun South-in 1-0 in hnehna an chang.
A lungthu kimna
Kum 2013 khan NECS Cup inelna hi ṭan a ni a, Ramhlun South chuan final-ah Leitan hnehin an champion a, kum 2014-ah pawh final-ah Armed Veng hnehin kum zawnin nomawi an chawi a, amaherawhchu kum thumnaah Armed Veng chu final-ah an hneh lo.
Kum 2016-ah Ramhlun South-in beisei an pha lo a, quarterfinal-ah Vaivakawn chu penalty-ah an hneh lo. Nikum khan semifinal an thleng leh a, Bawngkawn lakah an tlawm. Kuminah erawh team ṭha ber an ni tih pholangin Bawngkawn hian tunhnaia anmahni ang bawka sulhnu nei ṭha Chanmari hnehin an champion.
Beisei phak bak
Ramhlun South coach Samson Ramengmawia chuan, "Kan player ṭhahnem tak an khel thei lo a, he ti chunga kan champion thei hi kan lawm a ni. Player-te, coaching staff, veng chhung mipui leh khawtlang hruaitute thawhrah a ni," tiin Vanglaini a hrilh.
Ramhlun South hian tun ṭumah hian an player pawimawh Zohmingliana Ralte, Malsawmfela, Lalromawia leh nikum CYMA Football final-a chakna goal khungtu Lalawmpuia te an chhawr thei lo.
Lawmman
Champion Ramhlun South Rs 1,50,000
Runners Up Chanmari Rs 80,000
Fair Play Ramhlun South Rs 10,000
Community Award Ramhlun South Rs 10,000
Best Player Rochhingpuia, Chanmari Rs 5,000
Top Scorer R. Lalthanmawia (Goal 9), Ramhlun South Rs 5000
SemiFinalist : Rs 10,000
Electric Veng & Bawngkawn
Quarter Finalist : Rs 3,000
Chhinga Veng, Bethlehem Vengthlang, Bawngkawn, Venghlui, Electric Veng, Lengpui
CHAMPION Kalkawng
Ramhlun South
Ramhlun South 3 - 0 Saitual
Ramhlun South 5 - 1 Muallungthu
Ramhlun South 8 - 1 Darlawn VC I
Quarterfinal
Ramhlun South 1 - 1 Chanmari
Bethlehem Vengthlang 0 - 4 Ramhlun South
Chhinga Veng 0 - 2 Ramhlun South
Semifinal
Ramhlun South 3 - 1 Electric Veng
Final
Ramhlun South 1 - 0 Chanmari
RAS: R. Lalthanmawia 71'