Engtinnge England ni dawn le?

Zanin dar 1:15-ah England-in World Cup inbuatsaih nan friendly match an khel dawn a, an hmachhawn tur hi Netherlands a ni.

Dutch team-in World Cup khel dawn lo mah se team ṭha tak erawh an la ni reng a, England tan fiahna pawimawh tak a ni dawn.

England coach Gareth Southgate-a'n World Cup atan inbuatsaihna pawimawh tak a ni tih hriain duhthlan tur a neihte uluk takin a thli thlai a, a player zingah ram tana la inlan lo pali an tel.

Number 1 tur
Three Lions tana zawhna hmasa chu tu nge si ban nghak ang? tih hi a ni. England tana number 1 regular ṭhin mah se Joe Hart-a'n tun season-ah West Ham tan league match 15 khelin goal 33 ngawt a chhuah a, rin ngam a harsa.

Everton keeper Jordan Pickford leh Stoke City keeper Jack Butland-ten season pangngai tak an hmang a, World Cup champion tum tan keeper ṭha tawk an ni em tih erawh zawhna awm thei a ni.

Burnley keeper Nick Pope-a'n match 27-a khelhah goal 22 chiah a chhuah a, 'form' aṭanga teh tur a nih chuan ram tana la inlan ngai lo keeper hian si ban nghah a phu ber.

Tlarhnung buaina
Burnley defender James Tarkowski leh Swansea City defender Alfie Mawson-te hi ram tana la inlan ngai lo an ni a, central defence-a duhthlan tur defender-ten ram tana match an khelh tawh belhkhawm chu 27 a ni.

Player pawimawh ni ṭhin Gary Cahill, Chris Smalling leh Michael Keane te an khelh ṭhat tawk loh avangin squad-ah koh an ni lo a, koh zinga mi John Stones lah Manchester City-ah rinrawl a ni phak lo.

Southgate-a'n central defender pathum leh wing back chhawr a ching a, hemi tur hian player a nei ṭha tawk em tih erawh zawhna a ni - right back-ah Kyle Walker a ṭha tawk a, left back lamah Danny Rose hi Spurs-a Ben Davies tluk lotu a ni a, Ashley Young lah midfielder anga larchhuak a ni.

Midfield duhthlan
Hliam vanga talbuai reng Adam Lallana koh lehnghal a nih danah England midfield a ṭha tawk lo tih a chiang a, Jack Wilshere lah Arsenal tan tun season-a minute 1,013 chiah la inlan a ni bawk.

Liverpool captain Jordan Henderson leh Eric Dier inkawp fuh viau ṭhin mah se Hendo hi league match 20 chiah la khel a ni a, hetihrual hian league-a Dier leh Dele Alli chet ṭhatna hmuh hmaih theih a ni lo.

Alex Oxlade-Chamberlain-a'n Reds a pan hnuah a khel ṭha takzet a, mah se kum 35 mi midfielder hian ram tan central midfield-ah a theihna a la pholang lo.

Tlarhma ve thung
England tan Harry Kane a dam ṭhat phawt chuan tlarhma buaina tur a awm lo - Kane a dam ṭhat a, mual sir aṭanga Marcus Rashford leh Raheem Sterling ten an puih bawk chuan eng tlarhnung pawh ṭhiat turin an ṭha tawk.

Hei mai a ni lo - Jesse Lingard leh Leicester City striker Jamie Vardy an awm bawk a, Daniel Sturridge a dam ṭhat chuan thaibo a harsa bawk.

Zanina Southgate-a'n striker atana duhthlan tur a neih erawh Vardy leh Danny Welbeck te chiah an ni.