Italy tana khel thei Lionel Messi

Kumina World Cup cham­pion nih tum Argentina leh world champion vawi li ni tawh Italy ten Zirtawpni zan dar 1:15 hian friendly match an khel dawn a, an inkhelhna hmun tur hi Manchester City khelmual Etihad Stadium a ni.

Barcelona star Lionel Messi hi a pian tirha a hming an phuah sak chu Lionel Andres Messi Cuccittini tih a ni a, a pu chu Italian mi niin, dan dik thlapin Messi hian Italy khua leh tui nihna a nei thei.

Rosario, Argentina-a piang Messi hian kum 13 mi lek a nih laiin Barcelona a zawm a, football thiam chungchuang a nih avangin Italy bakah a sei lenna Spain te chuan an ram tana khel turin an duh vek. Mahse, a pianna Argentina tana khelh a thlang zawk thung.

Chanchin in ang lo
World champion vawi hnih ni tawh Argentina hi FIFA World Cup hnuhnung berah khan pahnihna an ni a, kuminah champion an tum ruh hle. Russia pan tura inbuatsaih nan pawh ram lian an hmachhawn dawn - Italy bakah hian March 28 hian Spain nen an inkhel zui leh ang.

Russia ticket nei thei tura Jorge Sampaoli naute kalkawng a awlsam lo hle, an match hnuhnung berah hnehna chan ngei ngei ngai chungin Ecuador an lenchilh a, si an phurh hnuah Messi-a hattrick hmangin 3-1 in hnehna an chang let a, an tling hram. World Cup-ah chuan Croatia, Iceland leh Nigeria te nen Group D-ah an awm khawm.

Argentina hian an thiam­puipa Messi hoin beiseina nen Russia an thlir mek laiin, zanina an khingpui tur Italy erawhin thawnthu dang an nei. Azzurri hi qualifier khelh laiin group hmahruaitu an nih phak loh avangin playoff an khelh a ngai a, Sweden an ngam loh zui avangin kum 1958 hnua a vawi khat nan World Cup an khel dawn lo.

A pawimawh
Friendly match ni mah se Argentina boss Jorge Sampaoli chuan an tan intuaihriamna hun a nih avangin an inkhelh tur hi a ngai pawimawh hle a, theihtawp an chhuah tur thu a sawi chhuak.

Sampaoli chuan, "Kan trai­ning leh kan inkhelh zawng zawngte hi World Cup inbuat­saihna a ni vek a, chu­vangin tih mai mai a thiang lo. Italy nen pawh hian Etihad Stadium-ah inkhel hmuhnawm leh ropui tak kan chhawpchhuah ka ring. Argentine mipui tawh phawt chuan ram tana khel te chu Argentina khelh dan ang taka khel turin an beisei a, keini pawhin theihtawp kan chhuah ang," a ti.

Etihad Stadium-a inkhel tur an nih avangin City defender Nicolas Otamendi tan thil thar a awm hran lo. Premier League player dang Sergio Romero (Man Utd), Willy Caballero (Chelsea) Marcos Rojo (Man Utd), Ramiro Funes Mori (Everton) leh Manuel Lanzini (West Ham) te pawh an mikhual lo hle ang.

Kawng a la awm
Gian Piero Ventura-a'n World Cup khel turin Italy a tlinpui zo lo a, a hna a thawk chhunzawm lo bawk. Italian manager thlak tur hi an la nei nghet lo a, Under 21 team coach Luigi Di Biagio chuan an senior team hi a enkawl lailawk a ni.

Di Biagio chuan, "Nikum November thla khan kan ram football chuan thawnthu lungchhiat thlak tak kan tawng a, ziah danglam leh siam ṭhat theih a ni tawh lo. Siamṭha thei tawh lo mah ila hma hun beiseina chu kan la nei thei a ni," tiin nakin hun atan beisei an la neih thu a sawi.

Kum 46 mi Luigi Di Biagio chuan sawi zawmin, "Player naupang ṭha tak tak kan nei a, kan rilru hian ngai a la awh thei tak tak lo tih chu ka hria. Mahse, tun hi kan tan insiamṭhatna hun a ni, Italy kan nih avangin kan dinhmun harsa tak aṭang hian huaisen takin kan tho chhuak tur a ni," tiin a sawi.