Khalid-a'n club training a zawm lo!

East Bengal coach Khalid Jamil-a'n ni hnih chhung club trai­ning a zawm duh tawh lo a, hemi chung­changah hian club technical director thar Subhash Bhowmick chuan na takin Aizawl FC coach hlui hi a dem.

Kolkata club hian I League nomawi an chawi theih loh hnuah an coach hlui Subhash Bhowmick hi an lalut a, Khalid nen coaching lama thawkdun tura tih an ni. Mahse, Bhowmick awm hnuah Khalid-a'n training a zawm duh lo a, coach induh ve tawk tak hian Mohun Bagan leh Churchill Brothers pawh lo enkawl tawh coach nena thawhdun hi a duh lo niin a lang.

Bhowmick chuan, "Khalid hi biak ka tum a, mah se tun thlengin kan phone call a la chhang duh lo. Tu nge nia a inhriat? Khalid Jamil hian Pep Guardiola emaw Jose Mourinho emaw Sir Alex Ferguson emaw a inti tur a ni lo. Engvanga practice chhim lo nge a nih tun thleng hian ka la hre lo.

"Khalid hi a rawn inlan lo a nih pawhin East Bengal hi a tawp phah dawn lo. Tin, ka ngawi mai mai dawn lo bawk. Kei chu Manoranjan Bhattacharya anga pa hawihhawm ka ni ve tlat lo," tiin a thlak tak technical director anga Khalid-a chu dawh reng a tum loh thu a sawi.

East Bengal hi Super Cup khel turin an inbuatsaih mek a, April 5-ah Indian Super League club Mumbai City nen an inhmachhawn ang.