HPC Cup Final ; Zobawk South vs Cherhlun

Lunglei DFA buatsaih High Power Committee (HPC) Cup 2018 chu vawi­in chawhnu dar 1:15 hian a hmawr bawk a ni dawn, Ṭhuamluaia Mual­ah Zobawk South leh Cherhlun ten nomawi an inchuh ang.

Ṭhuamluaia Muala phullem phah hnuah tournament hmasa ber HPC Cup 2012-ah khan Cherhlun hian final an thleng a. Mahse, a chak lo zawkah an ṭang, final vawi hnih an khelhna turah hian champion an duh khawp ang.

Cherhlun hian league round lamah harsatna an tawk lo a, last 16-ah nikum finalist Rahsiveng chu si li faiin an hneh thei. Quarterfinal-ah team ṭha Luangmual chu 2-1 a hnehin, semifinal-ah pawh kum 2012 cham­pion College Veng chu extra time-ah 2-1 in an hneh leh bawk.

Zobawk South hi an group awmna a nem deuh avangin goal an khung hnem thei hle. Hrang­chalkawn 21-0 a sawpin bul an ṭan a, Mualṭhuam South pawh 16-1 in an sawp thei.

Knockout round-ah erawh goal thun kawngah an tlahniam hret. Round of 16 ah si khat faia Farm Veng hneh hramin, 3-2 in Ramthar an paltlang leh a, a stage sang semifinal-ah erawh player kim loa khel chungin champion lai pet chhuaktu Pukpui chu 2-0 in an hneh.

Team pahnih hian goal khung an thiam a, nomawi duha tuihal ve ve an nih avangin inkhel a hmuhnawm hle ang.