Chungkuaa hun hman hun - Kapil

Coronavirus vanga India rama cricket inelna lian Indian Premier League inelna ṭan hmain chawlh lailawk a nih thu puan a ni a. India leh South Africa ten ODI series match thum an khelh tura hmasa ber pawh ruahsur vanga an khelh theih loh hnuah match hnuhnung pahnih chu Covid-19 vangin ṭhulh a ni.

India cricket legend Kapil Dev leh VVS Laxman te chuan coronavirus vanga buaina awm chhung chu cricketer tan chhungkua a hun hman ho theihna hun ṭha a nih thu a sawi. 1983 Cricket World Cup-a India captain Kapil Dev chuan, "Cricketer tan chuan in lama khung tawp chu thil thar a ni ang. Amaherawhchu tun hi chhungkuaa awm khawm theihna hun ṭha a ni a, inhliam enkawlna hun ṭha a ni a, taksa awm hahdamna hun ṭha a ni. Thuneituten Covid-19 hneh theih dan tur an duan chhung chu puipuinaa kal loh a him ber," tiin a cricketer a fuih.

India batsman ṭha VVS Laxman pawhin, "Pawnah kan chhuah loh a ngai a, khua leh tui ṭha ni turin dan kan zawm a pawimawh. Infiammite chu kan inthunun thei tur a ni a, tun hi hahdam hun a nih avangin in lamah hun kan hman a ngai a ni," tiin a sawi ve bawk.