Mizoram : Vawi 2=ah vawi 2 chak
Santosh Trophy vawi 72-naah Mizoram chuan nimin khan Odisha 5-0 in an hneh a, Goa an hneh tawh bawk avangin semifinal lut turin an dinhmun a ṭha hle.
Group B inkhel dangah Karnataka-in Goa lakah goal chhuah hmasa mah se tho chhuak lehin 4-1 in hnehna an chang.
Mizoram hian match hnihah point ruk hlawh chhuakin group hmahruaitu an ni a, nimina inlan lo Punjab leh Karnataka ten point thum hmu tawhin Odisha leh Goa ten point an la hmu lo.
Lalsangzuala Hmar hote hian Inrinni tlai dar 3:00 hian Punjab an hmachhawn dawn a, an hneh a nih chuan semifinal an lut ang.
Mizo an vul
Rabindra Sarobar Stadium-ah Odisha-in goal chance an nei hmasa a, ṭan phatah crossbar an tihper a, hemi hnu chuan Mizoramin inkhel an thunun.
Goa an hneh ṭuma goal hniha inrawlh Lalbiakhlua'n minute 37-naah goal a khung a, Lalromawia pawhin goal hnih bawk a khung leh. Samlukhai rawlthar hian qualifier match hnuhnung bera Assam an hneh ṭum aṭangin match thum chhung a zawnin goal hnih vek a khung.
Bawngkawn tlangval MS Dawngliana pawhin minute 73-naah scoresheet-ah a hming a nem kai a, Republic Veng tlangval
F. Lalrinpuia'n injury time-ah goal ngana a khung leh bawk.
Mizoram an ṭha
A hmuna inkhel entu Times of India correspondent Abhishek Ganguly chuan, "Mizoram an hmuhnawm a, 4-1-4-1 angin bul
ṭan mah se an khelh tak tak chuan 4-2-4 ang hial te a ni a, an goal nawr a na hle. Goal chance ṭhahnem tak an hlah a, an vanneih ṭum chu ni se goal riat aṭanga goal 10 khung thei tur an ni. An chak lohna lai sawi tur chu ni se midfield-ah ball hloh an nei leh ṭhin a, amaherawhchu an khingpuiten vawi khat mah an hmang ṭangkai lo," tiin Vanglaini hnenah Mizoram a fak.
Kumin Santosh Trophy-a hmuh dan sawi chhunzawmin ToI football wriker Abhishek chuan, "Mizoram tluk zeta khel ṭha chu West Bengal an ni a, an pahnih hian point ruk an hmuh avangin group hmahruaitu an nih theih ve ve a rinawm. Final-ah an inhmachhawn thei a nih chuan 'dream final' a ni ang," tiin a sawi.
Nikum khan Mizoram hian semifinal-ah West Bengal hi penalty shootout-ah an hneh lo a, a thlengtu niin champion lai an ni bawk.
Mizoram manager Hmingsanga chuan, "Kan match hmasa ber nena thlir chuan hma kan sawn a, Goa kan hneh aṭang khan inrintawkna nasa tak kan nei a ni," tiin hmasawnna a awm thu a sawi.
Chona lian zawk
Mizoram hi vawi hnih khelhah vawi hnih an chak a, amaherawhchu an hneh pahnih hi point la hmu lo an ni. 2014 champion tan Goa hneh hi result ṭha a ni a, chutih rualin vawi khat inlanna Karnataka pawhin group B-a rinkai zinga ngaih team Goa hi 4-1 in an sawp.
Inrinni hian Mizoramin 2015 Santosh Trophy semifinal-a an hneh loh Punjab an hmachhawn dawn a, semifinal khel tur zawnna leh group hmahruaitu inchuhna a tih theih ang.