2018 FIFA World Cup Tunlai milin an her rem
Khawvela inelna ngaihhlut ber ang hiala an sawi ṭhin FIFA World Cup chu June 14 hian Luzhniki Stadium, Moscow-ah khelh ṭan a ni dawn. Inelnaa tel tur ram 32 ten khelmual chhung leh pawnah nasa takin inpuahchahna an kalpui chho ṭan a, an jersey hak turte pawh an pholang ṭan ta.
90's ah kir ang
Mizoten a nawlpuiin FIFA World Cup an hmelhriat ṭan a, Italia '90 hi a hlawhtlin em avangin Mizote pawh football zunah thuk zawkin an uai phah a, official song 'To Be Number One' te chu tun thlenga football lar ber a ni.
Kuminah pawh he inelnaa an jersey design te kha kan hmu dawn a, amaherawhchu tunlai milin her danglam hret a ni tawh ang.
Germany: West Germany chuan final-ah Argentina hnehin 1990 World Cup-ah an champion a, Lothar Matthaus leh Rudi Voller te chu player langsar an ni. Kumin hian Germany thawmhnaw siamtu lar 'adidas' chuan '1990 World Cup' zul zuiin an jersey an her danglam a; Toni Kroos, Mesut Ozil leh Mats Hummels te hoin nomawi an chawi ve ang em tih chu hunin a hril ang.
Colombia: Germany ang thoin Colombia chuan 90 World Cup-a an jersey zul zuiin jersey an siam a, hming rawn lang nghal chu Carlos Valderrama a ni. Italia '90-a a sam avang te leh a thiam avang tea langsar zet Valderrama kha tunah chuan kum 56 mi a ni tawh a, Colombia aiawha rawn khel turte chu James Rodríguez te an ni tawh. Bayern Munich midfielder hian 2014 World Cup-ah khan golden boot a dawng.
Spain: 2010 World Cup champion Spain tan adidas chuan 1994 World Cup zul zuiin jersey a siamsak a, khami ṭuma Spain tana inaln Pep Guardiola leh Luis Enrique te chu tunah chuan manager langsar an ni tawh. Tun ṭumah hian Chelsea striker Alvaro Morata te chu player pawimawh ni thei tur zinga ngaih ni mah se Real Madrid striker hlui hi Germany leh Italy nen friendly match an khelh turah a tel pha lo.
Russia: Inelna thlengtu Russia chuan 1988 Summer Olympics-a an football team jersey entawnin an jersey an rawn siam. Seoul 1988-ah hian Soviet Union chuan final-ah Brazil 2-1 a hnehin gold medal an la a, hei hi Russia lam chuan infuih thar nan an hmang ang.
Silcharah Veteran Football:
International Veteran Football Champ-ionship 2018 khel turin G-90's te chuan nimin zing khan Aizawl chhuahsanin Silchar an pan a, nizan khan an match hmasa ber an khel nghal. Team pariat telna inelna hi nimin aṭanga ṭan niin March 24, Inrinni hian khelh zawh nghal tur a ni.
Mizoram aiawha kal G-90's hi tun hmaa player ṭha ṭhin intel khawm kha an ni a, tun ṭumah hian Aizawl FC defender hlui Hrangzuala te, Mizo left back ṭha B. Lalneihsanga (Maneiha), goalkeeper langsar ṭhin Ganesh Sunar te hoin an la ho peih a ni. G 90's chairman HF Lalrinpuia chuan, "Kum upat hnuah pawh taksa inenkawl ṭhat hi a la pawimawh tih kan lantir duh a, ruihlo laka fihlimna thei turin football hian nasa takin min la pui a ni. Football pangngai chawlhsan hnuah football a la khelh thei tih tuna inkhel mekte hnenah pholan kan duh a ni," tiin Vanglaini a hrilh.