NBA player pasarihin Covid-19 an vei Kevin Durant a tel

NBA club Brooklyn Nets chuan an player paliin coronavirus an vei thu Thawhlehni khan an puang a, vei zinga pakhatah hian Covid-19 lanchhuah dan tur an sawi tel bawk. Nets hian player hming puangzar lo mah se Kevin Durant chuan Covid-19 a vei thu a sawi.

Coronavirus avang hian NBA chuan 2019-20 regular season pawh an titawp rih a, Brooklyn Nets player pali hma hian Utah Jazz center Rudy Gobert leh a khelhpui Donovan Mitchell bakah Detroit Pistons center Christian Wood ten Covid-19 an vei thu an nemghet tawh a ni.

Golden State Warriors vawi hnih NBA champion nihpui tawhtu Durant chuan, "Mi zawng zawng fimkhur ru, inenkawl uluk la, inkhung hrang ru. He natna hi kan paltlang ngei ang," tiin tute pawh kai thei kan nih avanga fimkhur a ṭul thu a sawi.

Nets pawhin, "Kan player leh staff-te hriselna hi kan ngaih pawimawh hmasak ber a ni a, kan theih china ṭha berin kan enkawl ang," tiin thuchhuah an siam. Brooklyn Nets hian an match hnuhnung berah LA Lakers 104-102 in March 10 khan an hneh a, player langsar LeBron James leh Anthony Davis te pawhin an player-te an endik dawn.

Lakers chuan, "Nets nen March 10-a kan inkhelh avangin Covid-19 invenna dan kan zawm a, kan player-te kan endik ang a, kan him tlan zawk nan mi thiam zawkte kan rawn pah reng bawk," tiin thuchhuah an siam. United States-ah coronavirus a darh chhoh mek avangin NBA inelna ṭan leh hun pawh hriat theih a ni lo. Washington Wizards forward Davis Bertans chuan, "Tute pawh mai hi kar hnih chhung inah inkhung ila. Covid-19 kan vei emaw vei lo emaw pawh ni se in lama kan inkhung thei a nih chuan he natna hi kan hneh hma thei ang," tiin a sawi.