Record siamtu Ronaldo Ropuia

Cristiano Ronaldo chuan Portugal-in Republic of Ireland 2-1 a an hneh theih nan goal pawimawh pahnih a khung a, ram tana goal khung tam ber record a siam bawk. Manchester United-in tun nipui bazara an laklet Ronaldo-a'n khelmualah theihna a la nei sang hle.

Kum 36 mi Ronaldo hian Portugal tan goal 111 a khung ta a, kum 1993 leh 2006 chhunga Iran tana Ali Daei goal khung 109 chu a khum. Portugal captain Ronaldo leh Bayern Munich striker hlui Ali Daei te chauhin ram tan goal 90 emaw a aia tam emaw an khung thei a, Portugal captain record hi khum an awm a nih pawhin nghah rei a ngai khawp ang.

Goal Pawimawh
Estádio Algarve-ah Nilaini zan khan Portugal-in Republic of Ireland an mikhual a, World Cup khel tur zawnna a nih avangin inkhel pawimawh a ni. Inkhelh hmain Ronaldo hnenah Euro 2020 golden boot chawimawina an hlan a, Portugal captain hian Ali Daei record a nih rual tawh avangin record siam turin goal khat dang a la mamawh.

Portugal-in bul an ṭan ṭha a, Irish tlarhnung chetsual zarah Manchester United midfielder Bruno Fernandes-a'n penalty a hlawh chhuak. Minute 15-naah Ronaldo a rawn pen chhuak a, kum 19 mi Gavin Bazunu-a'n a dansak. Irish keeper Bazunu hi Manchester City player a ni a, loan hmangin Portsmouth-ah a khel mek.

Mak takin Ireland-in goal an khung hmasa a, John Egan-a'n minute 45-naah a tauh goal. Mikhual team hian minute 88-na thlengin hma an hruai a, chak thei dinhmunah an ding. Portugal-in chhantu an mamawh lai takin Ronaldo a rawn lang a, player ropui bik hian minute 89-naah dinglam aṭanga Goncalo Guedes cross chu a tauh goal.

Ronaldo leh a hote 'draw' ah an lungawi lo a, Portugal captain hian entu mipui leh a khelhpuite a fuih phur. Injury time minute ruknaah vei lam aṭanga Joao Mario cross chu Ronaldo bawkin a tauh goal a, Portugal 2-1 in an chak.

Record chu
Ram tana match 100 khel phak hi a ropui a, Ronaldo erawh goal 111 khung thei a nih avangin a record hi sawi nep theih a ni lo. Khawvel player ropui Pele (77), Maradona (34) leh Gerd Muller (68) ten goal 100 an hnaih lo a, Lionel Messi pawh kum 34 mi a nih tawh avang leh goal 76 chauh a la khung avangin Ronaldo record hi a khum tawh dawn lo.

Portugal captain hian penalty chhiar aṭangin goal 14 a khung a, penalty chhiar tel loh pawhin goal 97 a khung pha - chawlh mai a la tum loh avangin goal 100 chu a khung leh mai dawn. Friendly match chhiar tel loh pawhin competitive match ringawtah goal 91 a khung thei a, hei ringawt pawh hi player ropui dangte tih theih loh a ni.

Ronaldo hian first half (44) aiin second half (67) ah goal a khung tam a; a ke dinglamin goal 59 a khung a, a ke vei lam (25) aiin a lu hmangin (27) goal a la khung tam zawk.

Ricardo Quaresma leh João Moutinho te chuan Ronaldo goal khung tur vawi riat ve ve an siamsak a, Man United tana a khelhpui ṭhin Nani khan goal ruk a siamsak. English club tana a khelhpui tur Bruno Fernandes-a'n vawi khat chauh a la siamsak a, Ireland lakah pawh hian Bruno penalty hlawhchhuah chu Ronaldo-a'n a pet - Manchester United tana penalty pet tur chu a chiangah a ngaih theih.

Beiseina chu
Ronaldo a ropui a, ropui belh zel a duhna avang hian kum 36 mi a nih tawh hnuah pawh player ṭha bik a la nih theih phah. Ram tana goal khung tam ber record siam hnuah Ronaldo hian ram tana khel tam ber record siam a duh mai a rinawm.

Portugal captain hian ram tan match 180 a khel tling a, Real Madrid tana a khelhpui ṭhin Sergio Ramos tluk pha chiahin ram tana khelh tam lamah panganaah an awm. Tuna ram tana khel tam ber chu Malaysia centre back Soh Chin Ann a ni a, Ronaldo hian nihrual turin match 15 a la mamawh - thil harsa ni mah se thil theih loh erawh a ni lo.

Manchester United ṭantute pawhin Ronaldo lakah beiseina sang tak an nei thei ang, Republic of Ireland laka goal pawimawh a khungna tura a chevel chuan goal hmaah player hriam bik a ni tih a lantir a. Player naupang zawk Mason Greenwood, Marcus Rashford, Jadon Sancho leh Anthony Martial ten Ronaldo hneh aṭangin goal khung dan an zir belh thei bawk ang.

"Record thar a awm belh a ni ringawt lo a, record thar thawhchhuah a ni. Ka ngaih pawimawh em em chu, hlawhtlinna chan i duh a nih chuan 'tum' i nei tur a ni a, chumi mil chuan i thawkrim tur a ni. Chu i tumna chuan i ropuina chan tur chu a thlenpui ngei che ka beisei." - Cristiano Ronaldo, Portugal captain

(Ram tana goal khung tam ber record siamtu Ronaldo chuan a record siam chu midang fuih nan a hmang)

Portugal tana Ronaldo goal bihchianna