Ederson-a'n contract pawtsei

Manchester City goalkeeper Ederson chuan contract thar a ziak. Brazil intenational hian kum 2026 thleng Etihad Stadium-a cham chhunzawm turin inremna thuthlung hi a ziak fel a ni.

Pep Guardiola-a'n Man City a enkawl ṭan tirh lamah khan keeper ṭha a zawng a, mi hriat hlawh vak lo Ederson hi Benfica aṭangin sum tam takin a lalut a, a tirah ringhleltu awm mah se an tisual lo tih a lang zel.

Premier League vawi thum champion tawh Ederson chuan, "Hmun danga kal chakna ka nei lo, chuvangin contract ziak turin harsatna a awm lo hle. Khawvela squad ṭha ber zinga tel phak a, chumi bakah nomawi chawi tuma beitu zinga tel hi nuam ka ti," tiin a sawi tawh.

Premier League Golden Glove vawi hnih dawng tawh Ederson hian Man City tan match 194 a khelh aṭangin goal chhuah lohna match 95 a nei a, manager Guardiola-a'n a duh ang taka ball pek chhuah a thiam bawk avangin duhsak a hlawh hle.

Kum 28 mi Ederson chuan, "Pep Guardiola nena thawkdun hi ka hun tawna ropui berte zinga mi a ni," tiin a sawi hial. Manchester City director of football Txiki Begiristain chuan Ederson chu khawvela keeper ṭha berte zinga mi a nih thu a sawi ve bawk.

Man City hian tun hnaiah an player ṭha - Kevin de Bruyne, Fernandinho, John Stones leh Ruben Dias te chu hun rei zawk cham turin contract an lo ziah thar pui vek tawh bawk a ni.