Auh elna karah Tsitsipas a chak

Stefanos Tsitsipas chuan a zawna a vawi hnih nan inkhelh laklawh laiin 'Toilet break' a nei a, fans lamin an ngaithei lo - a hmuna inkhel entuten an au el hial; tennis inkhelah chuan in auh el hi a tam ngai lo.

Nimin zing khan Tsitsipas hian a khingpui Adrian Mannarino chu 6-3, 6-4, 6-7(4), 6-0 in a hneh, darkar hnih leh minute 41 an inkhelh chhungin vawi 27 zet aces a vaw chhuak a, tennis a khelh hun chhungin match khata aces a siam hnem ber ṭum a tawng.

Greek tlangval Tsitsipas chuan, "Khatiang zat aces ka siam tih ka hriat khan a mak ta ti zawk hial, na taka ka khingpui nawr buai kha ka tum a ni a, chumi tura a pawimawh hmasa service a fuh ṭhin khan kawngro a su hle," tiin a sawi.

Toilet break
Grand Slam hi set nga khelh a nih avangin a rei a, inkhelh karlakah hian dan ang thlapin chawlh a lak zuai theih. Tsitsipas pawhin an match hmasa zawkah Andy Murray nen an inkhelh laiin toilet break a nei, second round-ah pawh a nei zui leh.

Arthur Ashe Stadium-a inkhel entute chuan minute riat chuang hret an nghah a ngai, a inthiar chhung hian a khingpui Mannarino chuan a taksa lum a daih mai loh nan ball a lo vuak a ngai, toilet aṭanga stadium a rawn lut leh chu entu lamin an lo 'Boo' hial a ni.

Kum 23 mi Tsitsipas chuan, "In tih harhna," tiin toilet break a neih chungchang an zawhna a chhang a, insawifiah mah se fans lamin an pawm lo niin a lang. Britain tlangval Murray pawhin an inkhelh zawhin a khingpui chet dan hi a lo sawisel tawh.

Seeded pathumna Tsitsipas hian a match lehpekah chuan Carlos Alcaraz a hmachhawn leh ang. Spanish rawlthar hian inkhel dangah Arthur Rinderknech chu 7-6, 4-6, 6-1, 6-4 in a lo hneh ve thung, vawi 40 ngawt winners vaw chhuak thei hi lo chhinchhiah rawh u.

Medvedev a chak
Champion tura rinkai Daniil Medvedev-a'n a tir lamah a service hloh zuk mah se a talbuai chhunzawm lo. Russian tlangval hian a khingpui Dominik Koepfer chu 6-4, 6-1, 6-2 in a hneh a, a vawi khat nan Grand Slam title lak ngei a la beisei zel.

Kum 25 mi Medvedev hi hard court-a inkhel thiam a ni a, chak tura rinkai sa pawh a ni. Mahse, set hmasa ber game sarihnaah double fault a neih avangin a service a hloh a, mahse a insiamṭha zui nghal - set hnihnaah chuan winners vawi 10 vaw chhuakin unforced errors vawi nga chiah a nei.

Seeded pahnihna Medvedev chuan, "Match hmasa zawkah inkhel hautak ka hmachhawn tawh a, tunah chuan darkar hnih tling loah ka chak thei ta hram, lawmna tur a ni. Inelna a rei dawn avangin a tir lamah chuan hun hman rei loh hram a pawimawh," tiin a sawi.

Toronto Masters champion Medvedev hian a match lehpekah chuan Pablo Andujar a hmachhawn leh dawn. Spanish player Andujar hian inkhel dangah darkar hnih leh minute nga chhungin Philipp Kohlschreiber chu 6-4, 6-3, 6-1 in a lo hneh ve bawk.

Inkhel dang
Ningani zing lam inkhel dangah Andrey Rublev chuan Pedro Martinez lakah 7-6 (7-2), 6-7 (5-7), 6-1, 6-1 in hnehna a chang a, seeded pangana hian tualchhung tlangval Frances Tiafoe a hmachhawn leh ang - inkhel hmuhnawm a ni dawn.

American tlangval Tiafoe-a'n ṭantu a nei ṭha a, thlawpna ṭha tak hnuaiah Guido Pella chu 6-1, 6-2, 7-5 in a hneh. US mite hian tennis an ngaina a, a bik takin mipa player zingah ṭan tur an duh - Tiafoe an thlawp ṭha hi thil mak a ni hran lo.

Diego Schwartzman leh Kevin Anderson te inkhel chu ruah surin a ti buai. Louis Armstrong Stadium chu a chung khuhna hman ni mah se a phui lo, court chhungah tui a luh bakah inkhel entu lamin nihliap an hman a ngai hial.

Set khatna an khelh laiin ruah sur vangin minute 30 vel an chawl a, an chhunzawm leh hnuah pawh ruah vang bawkin an buai. An inkhelhna hi Arthur Ashe Stadium-ah sawn niin, inkhel inhnehtawk takah Schwartzman hi 7-6 (7-4), 6-3, 6-4 in a chak.