FA-in Chelsea thubuai a siamsak

English football-a thuneitu sang ber Football Association chuan Chelsea chu Liverpool nen an inkhelh ṭuma an player-te chet dan avangin thubuai a siamsak a, vawiin thlengin London club hian an thubuai hi an khinglet thei ang.

Anfield-a inkhel boruak sangah Liverpool leh Chelsea te 1-1 a inhnehtawkin an ṭin a, mahse, chawlhlawk hmaa Reece James hnawhchhuah leh Reds-in penalty an hlawhchhuah khan Chelsea player-te chu mawi lo takin an che.

FA chuan, "Chelsea chu Liverpool nena an inkhelh ṭuma an chet dan avangin FA Rule E20.1 dan an bawhchhia a, thubuai siamsak an ni. First half minute 48-na leh half time ham rik ham a nih ruala Chelsea player-te chet dan enin club chuan player-te a thunun tawk loah kan ngai a ni," an ti.

Liverpool leh Chelsea inkhelah khan Blues defender Reece James chuan Sadio Mane goal khung tur a kutin a dang a, referee Anthony Taylor-a'n a tirah hmu chiang lo mah se video assistant referee a rawn hnuah Reece James a hnawt chhuak a, Liverpool chu penalty a pe bawk.

Chelsea player-ten referee chungah an lungawi lohna nasa takin an lantir a, insum thei lo fal zingah defender Antonio Rudiger leh Blues goalkeeper Edouard Mendy te chu an chet dan avangin yellow card pek an ni.