France chak nan Griezmann-a goal a tawk zo lo

Barcelona aṭanga Atletico Madrid lama a kir tur thu a chian hnua a match hmasa berah Antoine Griezmann-a'n goal a khung a, France tana a goal khung hian a team erawh a chakpui zo lo.

Nilaini zan khan World Cup qualifier-ah France-in Bosnia-Herzegovina an mikhual a, mikhual team tan Edin Dzeko chuan tlangnel chhuahin goal hmahruai a khung.

Mahse, France tan Griezmann chuan si phurh sutna goal a khung a, goal dang a luh zui loh avangin France an chak zo lo - Chelsea nena sawizawm ni reng Jules Kounde chu hnawhchhuah a ni bawk.

France-in hnehna chang zo lo mah se group D-ah hma erawh an hruai chhunzawm zel a, match li an khelh tawhah point riat an nei mek - anmahni hnaih bertu Ukraine-in point li chiah an la nei a, team pahnih hi Inrinni zan dar 12:15-ah an intawng leh ang.

A hming Dzeko
Strasbourg khawpuia Stade de la Meinau-ah France-in Bosnia-Herzegovina an hmachhawn a, team pahnih squad leh qualifier-a an khelh tawh dan enin mualneitu lam hi chak chiang tura ngaih an ni.

Mahse, minute 36-naah rin loh zawk Bosnia-Herzegovina-in goal an khung a, France defender rual kar cheh karah Edin Dzeko chuan ṭha zetin hmahruaina goal a khung.

Kum 35 mi striker hian ram tan match 115 a khelh aṭanga goal 60 zet a khungna a ni a, a kum tam ve deuh tawh mah se Manchester City striker hlui hian goal khung nuam a la ti reng.

Nipui transfer khan AS Roma aṭangin Serie A champion Inter Milan a zawm a, season hmasaa match 38-a goal 13 khungtu striker hian league match hnihah goal a khung leh der tawh.

Griezmann-a goal
Rin loh takin mikhual team-in goal hmahruai an khung a, France an ngawi rei lo - goal an chhuah aṭanga minute thumna lekah si phurh an sut a, Griezmann-a khung a ni.

French forward a vannei tel - corner aṭanga ball kal chu tauh luh tumin a zuang a, tauh fuh lo mah se a taksain tawk fuhin goal-ah a lut. Video assistant referee hmangin goal-in line a pelh leh pelh loh en a ni a, a tawpah an pawmsak.

Kum 30 mi Griezmann hian Barcelona-ah beisei a phak loh hnuin nipui transfer tawp ni khan Atletico Madrid a zawm tur thu a tichiang a, 'vanneih goal' tia chhal theih ni mah se France tana a goal khung hian inrintawkna nena Atletico-a kir turin a pui ang - ram tan match 96-ah goal 39-a khung tawh.

Griezmann hian Barcelona tan tun season-ah league match thum khel hmanin goal khung a nei lo a, Barca league match hnuhnung bera 2-1 a Getafe an hnehna inkhelah phei chuan fan-ten an au el hial - a hlawh tam chu Lionel Messi chhuah phah chhanah an ngai a ni.

Kar fuh lo Kounde
Sevilla centre back Jules Kounde-a'n tun nipuiah Chelsea a pan dawn emaw a ti a, mahse, London club-in an dawrna chu a club khelhna Sevilla-in an pawm theih loh avangin Spanish club-ah a cham.

Kum 22 mi defender hian a club khelh châkna pan theih loh avanga rilru hnual chungin France squad a zawm. France coach Didier Deschamps-a'n duhsak takin bul a ṭantir a, Sead Kolasinac lakah hlauhawm taka a chet avangin hnawhchhuah a ni - yellow card pek zet a ni a, VAR hmanga ennawn a nih hnuah hnawhchhuah a ni.

France coach Deschamps chuan, "Player 10-a khelh chu a harsa tawh a, kan beisei ang result kan hmu lo," tiin inkhel chungchang a sawi a, anmahni hnaihtu ber Ukraine-in 2-2 a Kazakhstan an hnehtawk ve avangin hlauhthawnna tur erawh a la awm lo.

Coach Andriy Shevchenko-a'n a chhuahsan hnua an match hmasa berah Ukraine hi Roman Yaremchuk (2') leh Danylo Sikan (90+3') goal hmanga chak turah an inngai a, mahse, Ruslan Valiullin-a'n (74'; 90+5') si phurh a sut zel avangin point khatah an lungawi a ṭul.