Manchester City thubuai an ngaihtuah ṭan

UEFA club licensing leh financial fair play dan an bawhchhiat avanga kum hnih chhung European football-a inlan thei lo tura hrem Manchester City thubuai chu nimin khan ngaihtuah ṭan a ni. 

City chuan hrem an nihnaah thil dik tawk lo a awm nia ngaiin infiamna khawvela thubuai ngaihtuahtu sang ber  Court of Arbitration for Sport (CAS) hnenah an zualko a,  CAS chuan nimin khan he thubuai hi a ngaihtuah ṭan. 

Manchester khaw club hi February 14 khan UEFA hnuaia  Club Financial Control Body (CFCB) chuan a hrem a, kum hnih chhung European football-a inlan thei lo tura hrem an nih bakah pound maktaduai 25 chawitir an ni. 

CFCB chuan City hian 2012-2016 inkar khan UEFA  Financial Fair Play (FFP) nasa takin a bawhchhia niin an sawi a, hemi chungchang chhuinaah hian City chuan thuneitute an ṭawiawm ṭha tawk lo niin a sawi bawk. 

CFCB thurel danah City an lawm lo a, hremna tur tihchhuah a nih rualin an khin let tur thu an sawi nghal. City hian CFCB hi rin tlak loah a ngai a, a bik takin club thuruk media lama a darh dan thlirin CFCB hi a ring ngam lo. 

CAS hnuaia dan hremi pathum chuan he thubuai hi an ngaihtuah dawn a, Covid-19 vangin inrawn khawmna hi video conference hmangin an nei dawn - ni thum chhung a awh ang. 

Khawthlang media ten an tarlan dan chuan thubuai hi ni thum chhung lek ngaihtuah tur ni mah se kumin nipui tawp lam hma chu thutawp siam a ni dawn lo a, City chuan an la nghah hret a ngai dawn tihna a ni. 

City hian CAS-ah hnehna an chang lo a nih chuan season hnih lo awm turah Champions League an khel thei dawn lo tihna a ni a, tun season-ah Champions League nomawi lo chawi ta pawh ni se UEFA Super Cup-ah an inlan thei lo ang. 

Football Leaks chuan City email engemaw zat chu hmu fuhin, hemi chungchang hi German magazine lar Der Spiegel chuan November 2018 khan an ti chhuak. 

City hian sponsorship aṭanga an sum hmuh te chu a tak aia tamin an tarlang ṭhin nia sawi a ni a, hei hian an sum lakluh chu tam tham tak anga lantirin player lakluh chungchangah FFP an bum theih phah. 

Hei mai hi a ni lo. Kum 2009-2013 inkara coach Roberto Mancini kha season khata a hlawh tak chu pound maktaduai 1.45 nia tarlan ni mah se contract-a lang aia tam pound maktaduai 1.75 dang a dawng tel ṭhin!

Mancini hi City neitu Sheikh Mansour-a club dang Al Jazira Sports and Cultural Club-ah consultant angin ziah a ni a, chumia a hlawh ang chuan pound maktaduai 1.75 hi lantir a ni. 

City chuan Der Spiegel chanchinbuin an club chhungkaw thil an lo neih te chu dan ang lo taka lak ruk a niin an sawi a, hetihrual hian an club tih hmingchhiat leh mualpho tir tumna a nih thu an sawi.

Hriat tel tur erawh City hian ṭantu aiin ṭan lotu an ngah zawk. La Liga president Javier Tebas chuan City leh Paris St-Germain chu na takin a lo sawisel tawh a, Covid-19 vangin sum lamah buaina awm mah se FFP dan chu kaltlangpui zel ṭha a tih thu a sawi bawk.

 

Tebas hian City hremna pawh kaltlangpui ni se a duh tihna a ni. BBC-in a tarlan dan chuan UEFA lam hnai ṭhenkhat chuan hremna awm mek hi kaltlangpui a nih loh chuan FFP dan hman mek chuan a chhiat phah an hlau. 

Barcelona president Josep Maria Bartomeu chuan City hremna hi ṭha a tih thu a lo sawi tawh a, Catalan club coach hlui, City manager ni lai Pep Guardiola chuan a club hlui hi lo ṭawng ring lutuk lo turin a zilh tawh hial!

Manchester khaw club tan hian David Pannick leh  Paul Harris-te chu an ding dawn a, dan hremi pahnih chungah hian City hma hun chu a innghat thui khawp ang. 

City chief executive Ferran Soriano chuan hremna tihchhuah a nih tirh khan hrem an nihna chu a dik tawk loh thu langsar takin a lo sawi tawh a, CFCB thu rel dan leh hmalak dan chu anmahni do zawng ngawr ngawra kalpui a niah a ngai. 

Soriano chuan, "Pawn lamin a tihbuai miah loh rorelnain tum lawk sa nei miah loa kan chunga ro a rel kan beisei a ni. Kan fan-te hi thil pahnihah chiang se kan duh. 

"Pakhatnaah chuan min puhna zawng zawng hi dawt a ni. Pahnihnaah chuan he min puhna dik lohzia pholang tur hian kan theihna zawng zawng kan hlan ang," tiin a sawi. 

City fan-te tana hlauhthawnna tur chu hremna hi kaltlangpui a nih chuan player-te dinhmun a derthawng tel nghal dawn. Manager Pep Guardiola chuan City-ah a cham tur thu a sawi a, 100% a rin ngam erawh a harsa. 

Hriat tel tur chu Pep hian City thuneituten an hrilh danah an dik thu a sawi a, lo dik lo ta se chhuah a hreh dawn lo tihna a ni. Midfielder pawimawh Kevin de Bruyne chuan hremna hi kaltlangpui a nih chuan an hma hun an ngaihtuah a ngaih tur thu a sawi. 

KDB thusawi hriat rualin Ederson, Bernardo Silva, Raheem Sterling, Bernardo Silva leh Riyad Mahrez-te mitthlaah an lo lang nghal a, contract zo hnai zingah Sergio Aguero, Leroy Sane, John Stones leh Nicolas Otamendi-te an awm bawk. 

Liverpool-in Champions League nomawi an chawi avang khan pound maktaduai 100 chuang zetin an hausak belh a, final luh nana home match tin hlutna chu pound maktaduai nga velah chhut a ni bawk. City-in Champions League khel thei lo ta se, an sum chan tur hi a tam tham hle.