Third round-ah Halep a lut

US Open khelh laiah Simona Halep chuan third round a inhlangkai. Romanian nula hian kum 2016 hnua a vawi khat nan New York khawpuiah hian second round a paltlang ve leh chiah a ni.

Seeded 12-na Halep hian Arthur Ashe Stadium-ah Kristina Kucova chu 6-3, 6-1 in a hneh a, French Open leh Wimbledon champion tawh hian a vawi khat nan US Open title lak a beisei.

Halep hi player ṭha tak ni mah se US Open-ah hian beisei a phak lo ṭhin. 2016 khan quarterfinal hial thleng ve mah se, 2017 leh 2018-ah phei kha chuan hneh nei miah loin a tla nghal.

Kum 29 mi Halep chuan, "Vanneih tlak takin kan inkhelhna tur hmun an sawn a, ruah sur mah se buaina nei loin Arthur Ashe Stadium-ah kan inkhel thei, duhthusama ṭhain ka khel bawk," a ti. A match lehpekah chuan Elena Rybakina nen an inhmachhawn leh ang.

Tlu mah se a chak
Inkhel dangah Elena Rybakina chu Tamara Zidansek nen an inkhelh laiin a inhliam a, a ban rek dinglam chu a tliak emaw a ti hman hial. Set khatna lekah hliam tura mah se enkawl a nih hnuin a inkhel zui thei a, 6-3, 6-1 a hnehin changin second round a paltlang.

Belarus nula Sabalenka chuan, "Ka tluk dan kha a fuh lo a, ka ban ruh kha a tliak emaw ni ka ti hman hial. Harsa takin ka chak thei hram a, match khelh leh hmain ni khat chawlh ka neih avangin dam ṭhat hman ka beisei," tiin a sawi.

Naomi Osaka erawh a vannei. Japanese star hi a khingpui tur Olga Danilovic chu damlohna vangin a inlan thei lo, Serbian nula damloh dan hi coronavirus vang erawh a ni lo tih sawi lan a ni a, inkhelh hah ngai loin Osaka chu chakah an puang.

Gauff a tla
American nula pahnih inkhelah 2017 champion Sloane Stephens chuan tleirawl Coco Gauff chu 6-4, 6-2 in a hneh, kum 28 mi hian hnehna chang turin darkar khat leh minute ruk hun a hmang - Angelique Kerber leh Anhelina Kalinina inkhela chak zawk a hmachhawn leh dawn a ni.

Kum 17 mi Gauff hian theihna a nei sang, kum 15 mi leh a nih lai aṭangin khawvel hriat a hlawh tawh. Mahse inelna liana hlawhtling tur chuan a ruh a la no deuh a, player tawnhriat nei ṭha leh senior zawk lakah a vanduai leh ṭhin, hmabak eng tak erawh a nei chiang.

Inkhel dangah Grand Slam vawi thum champion tawh Garbine Muguruza, French Open champion Barbora Krejcikova, seeded pangana Elina Svitolina leh Daria Kasatkina te chuan an khingpui ṭheuh hnehin third round an inhlangkai ve bawk.