Denmark lakah Scotland an tlawm

Nilaini zan World Cup qualifying inkhelah Denmark chuan an mikhual Scotland 2-0 in an hneh a, mualneitu lam tan hian Daniel Wass (14') leh Joakim Maehle (15') ten hma takah goal an khung - mikhual lamin minute 90 chhungin a chhan letna tur an  nei lo.

Copenhagen-a inkhelah Denmark hian harsatna lian tham tawh an nei lo. Euro 2020 semifinalist hian qualifier match li an khelh tawhah hnehna an chang vek a, point 12 hmuin group F hmahruaitu an ni.

Kasper Hjulmand-a enkawl Denmark hian September 5, Pathianni zanah Faroe Islands an lenchilh leh dawn, chumi hnuah Israel nen an mikhual zui leh ang - an chesual viau a nih loh chuan Qatar World Cup an khel ngei ang.

Chak lo Scotland erawhin point nga chauh a la nei a, palina an nih avangin insiamṭhat an mamawh. Coach Steve Clarke chuan a tir lama an tlarhnung pawp chu an tuar nia a hriat thu a sawi chhuak.

Clarke chuan, "A tirah kan buai a, minute hnih pawh a tlin hma khan goal chhuah thei dinhmunah kan ding. Kan khelh dan phung nghet nei tur khan darkar chanve vel lai kan mamawh a ni," tiin a bul an ṭan fuh lo chungchang a sawi.