Pa ṭawng pawr Van Gaal a chak zo lo!

Netherlands coach thar Louis van Gaal-a'n Dutch FA hruaitu pawh ni se coach tura amah tho a indawr tur thu sawi mah se a thusawi leh khelmual erawh a la inhlat hret.

Manchester United boss hlui kaihhruaina hnuaiah Netherlands hian Nilaini zan khan Norway chu khualmualah an lenchilh a, World Cup qualifier-ah 1-1 in an inhnehtawk.

Norway tan tunlai European striker zinga 'hot' ber pawl Erling Braut Haaland chuan minute 20-na lekah goal hmahruai a khung a, Netherlands tan Davy Klaassen chuan si phurh sutna goal hi a khung.

Netherlands-in hnehna an chan zawh loh avangin match li an khelh tawh aṭangin point sarih chiah an la nei a, Zirtawpni zan dar 12:15-ah Montenegro nen an inkhel leh ang.

Chawlh zai rel lo
Coach thawm na tak Van Gaal-a'n Netherlands a kaihhruai leh tak avangin Dutch team inkhel turin ngaihven a hlawh a, mahse, langsar hmasa zawk erawh Haaland bawk a ni.

Borussia Dortmund striker hian team naran anga lang tan pawh striker hlauhawm tak a ni thei tho tih a pholang a, minute 20-naah ṭha taka ball a control hnuin goal hmahruai a khung - Netherlands an talbuai.

Kum 21 mi Haaland hian ram tan match 13-a khelha goal riat a khungna chiah a ni a, Dortmund tan tun season inelna hrang hrangah match nga khelin goal ruk a khung leh der tawh bawk.

Netherlands tan Klaasen chuan minute 36-naah si phurh a sut a, second half-ah Haaland vannei ngat se Norway chak thei an ni - Norwegian striker hian post a pet per a, a ui vawng vawng ang.

Beisei loh result
Louis van Gaal-a'n khawvela club langsar tak tak Ajax, Barcelona, AZ Alkmaar, Bayern Munich leh Manchester United enkawlin nomawi a lo chawi nual tawh a, tawnhriat a nei ṭha hle.

Netherlands pawh 2000-01 leh 2012-14 te khan a lo kaihruai tawh a, World Cup 2014-ah phei chuan semifinal a hruai thleng hial. LVG ban hnuah Netherlands an tlachhia a, an insiamṭha hleithei lo.

Ronald Koeman hnuaiah hma an sawn viaua an hriat laiin Dutch coach hian Barcelona a pansan a, Frank de Boer hoin Euro 2020 an hmachhawn - last 16 aṭangin an tla a, De Boer a bang a, LVG an lalut zui.

Mahse, Van Gaal-a hnuaiah Klaassen-a goal hmangin point an hlawh chhuak hram a, Dutch coach-in hnathawh tur tam tak a la nei tih a lang chiang - Virgil van Dijk a awm leh tawh bawk avangin Euro 2020-a Dutch team ai khan an ṭha leh tawh zawk.

LVG thlirna
Louis van Gaal chuan, "Striker ṭha tak Haaland an nei a, ball pass thiam tak Martin Odegaard an nei bawk a ni," a ti a, an khingpui Norway chu team ṭha tak an nih thu a sawi.

Dutch coach chuan sawi zawmin, "Haaland-te ang player hi chu ven an hautak ṭhin a, mahse, kan inkhelh chhung zawng khan vawi hnih vel bak chance a nei lo," a ti a, a naute khelh danah a lawm.

Group G-ah Netherlands hi Montenegro leh Norway te nen point sarih ṭheuh an nei a, a chung berah Turkey (8 points) awmin an hnuaiah Latvia (4) leh Gibraltar (0) an la awm.

Turkey hian group G inkhel dangah Montenegro chu 2-2 in an inhnehtawkpui. Cengiz Under leh Yusuf Yazici hmangin 2-0 in hma hruai mah se Montenegro lamin Adam Marusic leh Risto Radunovic hmangin an chhanglet a, Radunovic-a'n goal a khung hian minute 97-na a ni tawh!