Femina Miss India East 2018 ; Lily Darnei-i'n Sub-title pathum a la

fbb Colors Femina Miss India East 2018 final chu Swissotel, Kolkata-ah neih zawh a ni ta a, Femina Miss India Mizoram Lily Lalremkimi Darnei chuan sub-title pathum a la.

East Zone final hi March 22, Ningani khan neih a ni a, state 13 aiawhte an inlan. East Zone final-ah hian sub-title 10 sem a ni a, Mizoram represent Lily Darnei chuan - Body Beautiful, Fashion Icon leh Congeniality-te a la a ni.

Lily hi mimala che ṭha ber pawl a ni a; Femina Miss India Mizoram 2017 Rody H. Vanlalhriatpui chuan Lily Dar­nei hi a ṭawiawm.

Femina Miss India Mizoram Lily Darnei chuan sub-title pathum a la thei chu lawmawm a tih thu sawiin, Grand Finale neih leh turah pawh Mizoram aiawh a nih ang ngeia thlawp zel turin Mizo mipui a sawm a ni.

Zone pali
Grand Finale-a inlan thei tur thlanna hi Zone li-ah kalpui a ni a, East, West, North leh South Zone-ahte ṭhen a ni.

East Zone-ah hian state 13 - Chhattisgarh, Bihar, Jharkhand, Odisha, Sikkim, Assam, Mizoram, Tripura, Nagaland, Meghalaya, Arunachal Pradesh, Manipur leh West Bengal-te an awm.

Hmarchhak state-te chuan Grand Finale-a tel tur an thlang chhuak tawh a, state dangte hi chuan East Zone Final-ah hian contestant pathum an nei a, an state aiawh tur pakhat ṭheuh thlan chhuah a ni. East Zone aṭangin state 13 aiawhte chu Grand Finale-ah hian an inlan ang.

Zone tin aṭanga tlingte hi June thlaa Mumbai khawpuia Grand Finale neih turah an intihsiak dawn a ni.

State aiawh turte
March 11 khan FBB Big Bazar Mall, Guwahati-ah Femi­na Miss India North East State Audition bik chu zawh fel a lo ni tawh a, hmarchhak state aiawh turte a chiang tawh.

He hunah hian Miss Mizoram contestant Lily Lalremkimi Darnei chu Miss India Mizoram 2018-ah thlan niin, Miss India 2018 Finale-ah Mizoram ai a awh dawn. Femina Miss India Manipur Nimrit Kaur chuan an state ai a awh dawn a, Pramila Chettri chu Sikkim aiawh turin a tling. Ṭhnenawm state Meghalaya chuan Mary Khyriem chu an state aiawh turin an thehchhuak dawn bawk.

Arunachal Pradesh nula hmelṭha Osin Mosu chuan Femina Miss India-ah an state ai a awh dawn a, Ruopfuzhanov Whiso pawh Nagaland aiawhin a fehchhuak dawn. Hmarchhaka state lian leh mihring tamna ber Assam chuan Sunaina Kamath chu Femina Miss India 2018-ah hian an thehchhuak dawn bawk.

Femina Miss India Odisha atan Shrutiksha Nayak chu thlan a ni a, ani hian Grand Finale-ah a inlan thei dawn. Chhattisgarh aiawh turin Spandana chu a tling a, Stefy Patel chuan Jharkhand ai a awh dawn. Bihar represent tur chu Bhavna Jain a ni a, mihring tamna West Bengal chuan Prarthna Sarkar chu fbb Colors Femina Miss India 2018-ah an thehchhuak dawn bawk.

Mentor lam hi
Zone tin aṭanga tlingte hian celebrity mentor an nei dawn a, anni hian Grand Finale atan an kaihruai ang.

East Zone mentor atana thlan zingah hian model lar leh actress ni bawk Pooja Chopra chu a tel. Kolkata lam chhuak Pooja Chopra hi kum 2009 khan Femina Miss India atan thlan a a ni a, he mi kum vek hian India aiawhin South Africa-a Miss World thlannah telin semi-finalist a ni. Miss World-ah hian Beauty with a Purpose award a la bawk.

Chopra bakah hian Indian film director lar Srijit Mu­kherjee, Femina Miss India 2nd Runner Up lo ni tawh Komal Sood, film star Bonny Sengupta leh Subhashree Ganguly te pawh an tel a ni.