GIG Motors Mizoram Super League Season 4 ; A thiam ber Zarkawt BCA an champion
Mizoram chhunga basketball inelna sang ber Mizoram Super League-ah Zarkawt BCA hun a inher chhuak a, Ningani zan khan Tuikual South chu game 2-ah 85-65 in an hneh a, game 1-ah 75-68 a an hneh tawh bawk avangin game 3 khelh ngai tawh loin an champion.
Hawla Indoor Stadium khat tlatin mipui an pungkhawm a, MBBA lamin an hmun neihin mipui a dawl zo dawn lo tih hre chungin stadium kawtah 'big screen' in an tichhuak. Entu lam aṭanga thlir chuan inelna hlawhtling a ni.
Court chhungah erawh Most Valuable Player atana thlan Lalrina Renthlei telna BCA an chungnung a, inkhelin a vawrtawp a thleng pha lo.
An inzir e
Tuikual South coach KC Lalliantluanga game 1-a an tihsual aṭanga inzirin tawnhriat nei ṭha pali F. Zodinthara, Lalmuanpuia Zote, K. Vanlalruata, Lalrinzuala Hnamte te zingah theihna nei sang Lalnunpuia Renthlei (R-a) a rawn tel bawk.
TKS-in bul an ṭan ṭha a, BCA an el tawk a, amaherawhchu Zarkawt lamin bench aṭanga Dennis Lalmuanpuia, Lalremsanga leh R. Lalfakawma te an luhtir thei a. An khel rei zel a, an squad chhahna a lang zel bawk.
First quarter-ah Zarkawt hian 20-15 in hma an hruai tawh a, BCA player-te'n freethrow vawi liah vawi li an luh laiin Tuikual South lamiin vawi rukah vawi hnih chauh an lut, team pahnih danglamna hi freethrow-ah a la ngaih theih.
An fal ta
BCA coach Lalruatfela'n TKS nawrna ber R-a hahdamna hun pe loin Bungkawn tlangval player ven zel chu nawr letna atan an hmang a, loh theih loa R-a a tlan let ve zel avangin second quarter-ah point 10 zet a neih hnuah attempt a ngah ngaihtuahin point a nei tam zui tawh lo.
Second quarter-ah Tuikual South-in first quarter aiin point khatin hma an sawn a, point 31-ah inhlangkai mah se an khingpui BCA erawhin point 26 tehmeuh an luh belh a, half time-ah 46-31 a ni.
Huaisen mah se
Tuikual South mipuiin thilmak a thlen an la beisei fan a, an thawm an la tizawi chuang lo. An veng tlangval Dina'n a theihna zawng zawng a rawn chhuah a, ven loa dah Lalfakmawia'n 3-point an rawn neih bawk avangin 50-55 a ni hman a, halftime-a 'chiang' kha 'chiang lo' a ni leh ta.
Inkhel boruak a nung chho hman a, amaherawhchu BCA coach Afela'n bench lama a dah ṭhat Lalrina leh Zonuna te a luhtir leh hnuah team ṭha zawk danglamna a lang. Zarkawt BCA-in insiamṭha turin hun an mamawh rei lo a, TKS khelh ṭhatna ber quarter-ah pawh 20-19 in an la chak tho.
BCA an ṭha ber
Fourth quarter-ah pawh BCA bawk an che ṭha a; Lalrina thlek rualin amah vengtu leh mipui an thle a, a bum rualin mipui an ri huk a, a luh rualin BCA ṭantute an au a, Zonuna leh Remsanga ten inkhel hmuhnawmna an belh bawk.
Hun tawpah team ṭha zawk Zarkawtin 85-65 in hnehna an chang, BCA hian MSL4 league round match nga an khelhah hnehna an chang vek a, semifinal-ah Khatla TBL lakah game khat chak lo zeuh mah se tun season-a team ṭha ber an ni tih a tawp an khar danin a nemnghet.
Lalrina'n a thawhrim rah a seng
Tuikhuahtlang tlangval Lalrina Renthlei-in MSL3-a Mission Veng Vikings a champion pui hnuin chona thar hmachhawn turin Zarkawt BCA a zawm a, MVP nichunga nomawi chawi lehin MSL-a club hrang pahnih champion pui thei hmasa ber a ni. BCA guard Lalrina hian MSL4-a match 10 a khelh aṭangin point 188 a nei a, point ngah ber a ni. Match tinah 18.8 point lut ang a ni a, Mission VT Hollow player Ronald Zomuanpuia chiah (20.43) hemi kawngah hian a pha lo.
MSL4-ah Lalrina hian 3 points vawi 15 zet a nei a, assists vawi 24 a nei a, rebound vawi 76 a lak bakah steal vawi 17 a nei a, statistcis aṭanga thlirin MVP a nihna dal thei tur a awm lo a, a sang fâl a, a hmuna thlirtuten an phuzia an hre chiang lehzual. Lalrina chuan, "Personal trainer ka la a, ka trainer Puipuia hian basketball player milin a lo inzir chiang a, ani zarah awmze neiin gym nen ṭangkawpin ka inpuahchah a, a chungah ka lawm hle a ni. Tun ṭum hi ka fit ṭhat ber ṭum a ni a, amaherawhchu vanduai thlak takin ka inhliam a, ka tum angin ka khel chhuak thei lo," tiin a sawi a, BCA guard hian semifinal-ah pawh Vanglaini palai hnenah hliam nei chunga a inkhelh thu hi a lo sawi tawh.
Amaherawhchu Lalrina hi mipui tam zawkin hliam a nei tih an hre lo a, a chhan chu court chhungah a thiamna a lantir tho vang a ni. BCA player chuan, "Chona thar hmachhawn turin BCA ka zawm a, anni hi la champion ngai lo an ni. Ka champion pui thei hi ka lawm takzet a ni," tiin a sawi. Zarkawt BCA big man Matthew Sailo chu best defensive player atan thlan a ni a, Zarkawt tlangval hian tun season-ah block 25 zet a nei pha a ni.
Season khatnaa che ṭha ber 'Rookie of the Season'-ah Tuikual South player Vanlalrinchhana thlan a ni a, ani hian hliam vanga final game 2-a khel lo chungin point 62 a nei pha a, season khatnaa match tina average 7.75 a nei pha hi chhuantham a tling.
All Star Team
hmachhawn ang kan ni
– KC Lalliantluanga, TKS coach
Tuikual South-in coach KC Lalliantluanga hoin MSL2-ah final an lut tawh a, India captain Vishesh Bhriguvanshi leh Pratham Singh te telna Khatla TBL an hneh lo. Tun
ṭumah hian Mizo hlanga khel Zarkawt BCA an hmachhawn a, amaherawhchu MZU Sports-a inhliam Rookie of the season-a thlan Vanlalrinchhana an chhawr thei lo a, an player pali zet chu chhun lamah college basketball final khel an ni bawk.
TKS coach KC-a chuan, "Kan theihna zawng zawng kan chhhuah a, amaherawhchu inhliam leh inkhel chau sa kan kawl avangin kan hna harsa tawh sa hi a harsat belh. Chutihrualin dam ṭha vek pawh ni ila, kan hneh chuang lo ang. All Star Team hmachhawn ang mai kan ni a, nuam ti takin an khel a, taksa leh rilru lamah pawh final hmachawn kha keini aiin an inpeih zawk a ni. Zarkawt BCA te ka lawmpui e," tiin chhuanlam siam a tum lo.
Tuikual South mipui an fakawm a, tualchhung infiamnaa supporter nei ṭha ber zinga mi an ni. An player-te pawhin anmahni ṭantute tih lawm tumin theihtawp an chhuah tih inkhelh bana captain Mapuia Zote leh Dina te mittuiin a nemnghet.
Pathian vang a ni
– Lalruatfela , BCA coach
Zarkawt BCA-in MSL1-ah final an lut tawh a, amaherawhchu tun ang em em hian nomawi duhin an la tuihal ngai lo. MSL2-ah phei chuan relegation playoff hial khel mah se nomawi beiseiin team ṭha zawk dinin an rawn tho leh a, Zarkawt mipui leh hmun hrang hranga BCA ṭantuten a hmun ngeiah an ṭawiawm ṭha bawk.
BCA coach Lalruatfela chuan, "Mizo hlangin MSL kan khel a, state pawn player kan lak ai khan ṭantu kan nei ṭha zawk a, team pawh kan inlungrual zawk. Tun season chhung zawnga ṭha taka min ṭawiawmtute zawng zawng chungah lawmthu ka sawi," tiin Vanglaini a hrilh.
Team ṭha ber a ni em tih zawhna chhangin Dawrpui tlangval Afela chuan, "Chuti zawng chuan kei chuan ka thlir lo. Tun season-ah player inhliam lian tham kan nei lo a, inlungrual takin season ṭha takin kan khel tluan thei a, sawi tawh angin heng zawng zawng hi Pathian malsawmna a ni. Tun season tluka kan thil tihna apianga Pathian hming lam hnem kan la nei ngai lo. Pathian ṭanpuina vang liau liaua champion kan ni," tiiin a sawi.