Boxer training hun sawn hla

India aiawha Olympic hmachhawn tur boxer-te training hun atan Boxing Federation of India-in June 10 ruat mah se hruaitu lam thu inhmuh loh avangin kar khat talin training a tlai phah ang.

Training hi mipa leh hmeichhia tan a ni a, Patiala-a neih turin ruahmanna an siam. BFI executive director R K Sacheti chuan, "Kan rawtna chungchangah Sports Authority of India (SAI) chhanna kan nghak a, phalna hi ni hnih khat hnuah hmuh inbeisei mah ila training dan tur ruahmanna siam turin kar khat tal kan mamawh dawn," tiin a sawi.

Tokyo Games-a inlan turin boxer pakua Amit Panghal (52kg), Manish Kaushik (63kg), Vikas Krishan (69kg), Ashish Kumar (75kg), Satish Kumar (+91kg), M C Mary Kom (51kg), Simranjit Kaur (60kg), Lovlina Borgohain (69kg) leh Pooja Rani (75kg) te an tling.

Kalphung pangngaiah chuan mipa hi Patiala-ah an training ṭhin a, hmeichhia hi Delhi-ah an training ṭhin thung. May 23 khan BFI thuneitute, boxer leh coach-te video conference hmangin kalpui dan tur an rel a, June 10 aṭanga Patiala-a training rual turin rawtna an siam.

Thla hmasa khan sorkar laipui chuan entu awm loin inelna a kalpui theih thu an puang a, amaherawhchu Covid-19 dinhmun a zirin State sorkar chu thu tawp siamtu an ni.

SAI lam danah training kalpui theih ni mah se sparring phal a ni lo a, ring chhung luh an phal lo. Training hi kalpui a nih dawn chuan boxer leh federation lamin intiamkamna an ziah hmasak a ṭul ang.