I League rawlthar thiam ber Samuel

Shillong Lajong captain Samuel Lalmuanpuia chu I League Emerging Player of the League-ah thlan a ni. Indian football-ah Mizo hming a langsar zel a, Samuel hma hian Kerala Blasters defender Lalruatthara chu Indian Super League-ah Emerging Player of the League-a thlan a lo ni tawh bawk.

Samuel chuan, "Ka phu loh malsawmna a ni a, Pathian vang liau liau a ni. Hetiang chawimawina ka dawn phak hi ka ring lo a, ka khelhpui leh Lajong chhungkuain min duhsakna rah ka seng a ni," tiin Vanglaini hnenah a sawi a, a chawimawina dawn chu mimal thawhrim rah angin a sawi duh lo.

Zemabawk North rawlthar hian tun season I League-ah match 17 khelin goal thum a khung a, assist vawi nga a nei bawk. Season ṭan dawnah kum naupangte nichungin Lajong captain-ah ruat a ni a, tlin takin a mawhphurhna a hlen.

Mohun Bagan coach Sankarlal Chakraborty-a'n India rama set piece pet thiam ber a tih Samuel chuan, "Shillong Premier League-ah captain ka ni a, I League meuha nih erawh ka beisei lo. Tunah beisei loh chawimawina ka dawng leh a, Mizo mipui min lo ṭan ṭhintute ṭawngṭaina rah pawh a ni tih ka hria," tiin amah duhsaktute a theihnghilh lo.

Samuel-a'n season duhawm tak a hman avangin Indian club ṭhate chil a ti put a, mah se kum 19 mi midfielder hian Lajong-ah kum khat dang contract a la neih avangin a hmalam hun a la chiang thei rih lo.