Mizoram hmaah Punjab
Santosh Trophy vawi 72-naah Mizoramin vawiin tlai dar 3:00 hian Punjab an hmachhawn dawn.
An inkhelhna hmun tur Howrah Stadium-ah hian Punjab-in Odisha 2-1 in an hneh tawh a, Mizoram tan erawh tun ṭum hi an vawi khat khelhna tur a ni ang.
Group B inkhel dangah Karnataka leh Odisha te Rabindra Sarobar Stadium-ah an inhmachhawn ang.
He group-ah hian Mizoram, Punjab leh Karnataka ten hnehna an la chang zel a, coach Lalsangzuala Hmar hote danglamna erawh vawi hnih an inkhel tawh a, team dang pahnih erawh vawiin hi an vawi hnih inlanna tur chauh a ni.
Punjab leh Mizoram
Mizoramin February 2015 khan National Games football-ah gold medal dawng turin Punjab 1-0 in an hneh a, kum 2014-ah Santosh Trophy an chawi tawh bawk avangin nomawi pahnih kawltu an ni.
Thla khat hnuah Punjab-in phuba an la nghal a, Santosh Trophy semifinal-ah Mizoram hi penalty shootout hmangin an hneh. Hemi ṭum hian pumrua lian ṭha Punjab-in defensive game an khel a, minute 90 chhungin goal a lut lo.
Extra time-ah Manveer Singh hmangin Punjab-in hma an hruai a, amaherawhchu first half-ah vek tun ṭuma che ṭha Lalbiakhlua hmangin an sut. Penalty shootout-ah pawh an pet chhuah vek hnuah an inhnehtawk a, an pet ṭhat leh hnuah Punjab hi 12-11 in an chak hram - tuna ISL Emerging Player of the League ni ta Lalruatthara'n a pet goal lo.
Nikum khan Punjab leh Mizoram hi group khatah an awm a, goal awm loin an inhnehtawk. Mizoramin semifinal an thlen laiin Punjab erawhin group stage an paltlang lo.
State inelna zawngin Punjab leh Mizoram hi an intawng ngun hle. Nikum khan National Junior Football Championships final-ah Mizoram hnehin an champion a, hemi ṭuma manager Hmingthansanga hi tun ṭuma Mizoram team enkawltu tho hi a ni.
Kumin kum tir khan All India Police Meet-ah Punjab Police chuan Mizoram Police chu semifinal-ah an hneh a, tun ṭuma Mizoram team-ah hian Police player paruk an awm.
February khan Khelo India football final (Under 17) ah Mizoram leh Punjab bawk hi an inkhel a, Mizoram hi 3-2 a chakin an champion.
Kan dam ṭha–manager
Mizoram manager Hmingthansanga chuan, "Kan khelhna tur hmun Howrah Stadium hi a hmaa kan khelhna ai khan a la hla zawk a, amaherawhchu khelmual a ṭha zawk a, a tê deuh zawk tiin an sawi. Khelmual vang hian kan dinhmun a chhiat phahna tur ka hmu lo a, tun dinhmunah chuan team boruak a ṭhat avangin kan inringtawk hle a ni," tiin Vanglaini a hrilh.
Hmingsanga chuan sawi chhunzawmin, "Player an dam ṭha a, chu chu a lawmawm lai a ni. Semifinal kan luh theihna tur a nih avangin inkhel pawimawh a ni a, kan theihna zawng zawngin kan khel ang," tiin a sawi.
Mizoram hian hnehna an chang a nih chuan group match hnuhnung bera Karnataka an hmachhawn hunah hahdam zawkin an khel thei ang.